Dialuna ultimo Minister di Asuntonan Economico, Comunicacion y Desaroyo Sostenibel, Geoffrey Wever den nomber di Gobierno di Aruba, a ricibi oficialmente for di presidente di Sociaal- Economische Raad, Sra. Tisa La Sorte, y e secretario general e conseho over di economia informal na Aruba.
Sociaal- Economische Raad como un organo consultativo independiente estableci pa ley, ta duna conseho na gobierno riba asuntonan di mayor importancia riba terenonan social y economico. Sociaal- Economische Raad ta conta cu representacion di organisacionnan di dunadornan di trabao y empleadonan y expertonan independiente.
Segun e conseho di Sociaal- Economische Raad, economia informal ta referi na actividadnan economico cu pa ley y practica no ta wordo regla na un manera formal. Ta trata di actividadnan economico cu no ta conta cu tur e permisonan necesario, no ta cumpli cu tur obligacionan fiscal y no ta registra na instancianan gubernamental. Motibonan di eherce actividadnan economico na un manera informal ta varia, for di acceso na e mercado, te cu leynan existente.
E resultadonan preliminario ta indica cu e impacto di e economia informal ta wordo calcula na un averahe di 13% di e producto interno bruto over di e periodo 1990 pa 2019. Pa disminui actividadnan informal, Sociaal- Economsiche Raad ta recomenda intensiva supervision y control, hisa e sumanan di boet, cambio di belasting directo na indirecto y registracion obligatorio di esnan indocumenta.
Gobierno di Aruba conhuntamento cu Ministerio di Asuntonan Economico, Comunicacion y Desaroyo Sostenibel ta gradici Sociaal-Economische Raad pa e conseho over di economia informal. Basa riba e conseho y den liña cu maneho di Gobierno di Aruba, lo traha y implementa un plan di accion pa combati e economia informal.
