Den nomber di Gobierno di Aruba y Pueblo di Aruba, Prome Minister Evelyn Wever-Croes ta haci un invitacion na lidernan sindical pa sinta cu Gobierno pa dialoga.

“En bista di accionnan organisa pa lidernan sindical diaranson 8 di december, 2021, mi kier reitera e posicion di Gobierno di Aruba. Gobierno ta comprende e lucha sindical y tambe tin comprension pa e posicion di empleadonan publico. Gobierno di Aruba kier mescos cu lidernan sindical. Nos tur kier mira recuperacion di nos pais pa asina tur ciudadano ricibi e salario pa cua nan ta traha. 

Pa e motibo aki, for di siman pasa caba, Gobierno a invita sindicatonan pa dialoga y duna sindicatonan tur informacion financiero cu sindicatonan ta desea y indica cu nan no a haya ainda. Proposicion di Gobierno ta pa sinta na mesa cu sindicatonan y hunto yega na un punto di salida y hunto tambe negocia cu Hulanda. Esaki ta e solucion cu no solamente ta trece benificio so pa e clase trahado y pa Gobierno, pero tambe ta trece claridad. Lamentablemente, no ta tur sindicato a acepta e propuesta di Gobierno y Gobierno lo sigui cu esnan cu si a acepta e propuesta. 

Mi a ripara tambe cu lamentablemente tin lidernan politico cu ta mal uza y mancha e lucha sindical. P’esey, durante mi reunion cu sindicatonan, mi a alerta sindicatonan pa percura pa nan lucha keda un lucha sindical y no un lucha politico. Pa no permiti politiconan cu agenda politico influencia nan y mancha e lucha sindical. 

E realidad ta, cu Aruba ta depende di sosten di likides di Hulanda pa e luna di december paga salario di e propio empleadonan publico, pa paga bijstand hunto cu bonus, pa paga gastonan di siguridad di nos pais, di cuido medico, di enseñansa. Pa esaki, nos ta depende e luna aki ainda di e sosten di likides di Hulanda y pa e siguiente 6 luna, Aruba ta depende di esaki. Esaki ta e realidad cu nos ta biba den dje.

E realidad ta tambe cu Aruba ta recuperando y ta den pleno desaroyo. Aruba tin hopi potencial. Pero e realidad ta tambe cu e accionnan di sindicalistanan ta afecta nos recuperacion. Mas lihe nos recupera, mas lihe nos ta bay bek na normalidad. Mas lihe nos recupera, mas lihe e recorte di salario lo wordo elimina. 

Mi ta ripiti. Gobierno kier mesun cos cu lidernan sindical. Pa cua motibo tambe nos a acerca mediador. Mi ta invita e lidernan sindical un biaha mas, pa continua cu dialogo. Tempo no ta na nos fabor. Tempo pronto lo caba cu nos. Diabierna 17 di december lo tuma luga Conseho di Minister di Reino. Y si nos no yega na algo conhunto, nos mes ta duna Hulanda atrobe oportunidad pa tuma decision pa nos. un decision cu lo por conta pa henter aña 2022. 

P’esey, un biaha mas, mi ta extende invitacion na tur lider sindical y enfatisa cu Gobierno kier mesun cos cu boso. Gobierno kier drenta den e fase di recuperacion y den e etapa na unda cu Aruba no ta depende di Hulanda, y asina elimina e recorte di 12.6 di salario. Pa logra esaki, nos mester dialoga. E comision financiero cu Gobierno a apunta ta cla pa reuni cualkier momento. Pero tempo no ta na nos fabor. 

Mi ta haci apelacion na nos clase trahado, tur esnan cu ta wordo afecta pa e accionnan aki, por fabor, papia cu bo lider sindical. Ban corda cu na e momentonan aki, Aruba ta den pleno recuperacion. Pero, nos no a yega ainda. Na e momento aki Aruba tin mester di nos tur pa logra recuperacion, bienestar y progreso di nos pais”.