ORANJESTAD – Awe mainta, durante un conferencia virtual, Minister di Husticia y Asuntonan Social Sr. Rocco Tjon a firma un MOU cu un di e socionan den nos region, esta Mental Health Caribbean (MHC), pa loke ta e tematica di adiccion y salud mental. Lo bay coopera mas di serca cu otro, specificamente riba e parti di experticio y e parti di cursonan cu ta un parti hopi importante tambe. Pa e motibo aki, na comienso di otro aña lo bay tin un curso pa profesionalnan den e ramo di salud mental, di cual un grupo grandi lo bay participa. E meta final ta pa logra haci e cuido di salud mental uno mas accesibel como tambe baha e listanan di espera, y a traves di e tipo di cooperacionnan aki logra acelera e procesonan aki. 

Segun Minister Tjon a splica, den e MOU tambe a incorpora cuatro punto specifico. A incorpora e parti di crea mas cooperacion di uso di documentonan standardisa, en bes di reinventa e wiel. Tambe a toca e parti di “bemoeizorg”, cual ta e ayudo cu por brinda na adictonan riba caya, pues lo bin cu un proyecto riba e tematica aki pa asina percura pa brinda e ayudo necesario pa esnan cu tin mester di dje. Adicionalmente y specificamente, pa loke ta trata Cuerpo Policial y esnan cu ta traha na KIA, tambe lo bin cu un curso riba e tematica di “verslavingszorg” y salud mental. Esaki ta hopi importante pa Cuerpo Policial mirando cu e agentenan policial ta bin den contacto hopi bes cu e esnan cu ta sufri di adiccion of di e parti di salud mental. Mescos e ta conta pa e trahadonan di prizon, y eynan principalmente, lo percura pa na momento cu un persona sali for di KIA, y prome cu e sali caba, percura pa di e forma aki su reintegracion y resocialisacion ta uno mas exitoso. 

E MOU ta toca tambe e parti di prevencion, cual ta un punto hopi importante, mirando e experticionan cu ta necesario pa por atende cu e aspectonan aki, ta haci cu e ta importante pa traha mas di serca cu otro den Reino. Asina, luna pasa tawata tin un congreso aki na Aruba mes caminda e diferente organisacionnan manera RESPALDO y nan contrapartidanan den Reino tambe a firma un MOU, caminda nan tambe lo bay traha mas di serca cu otro. E motibo pa esaki, hopi bes tin di haber cu con costoso e ta pa brinda e ayudo aki y pa e motibo ey si nos logra uni forsa nos por brinda un ayudo mucho mas miho. 

Por ultimo e Mandatario a splica cu, a reuni cu FADA, caminda na comienso di aña nan lo anuncia e adaptacion di nan “business model” caminda nan lo bay enfoka hopi riba e parti di slaud mental tambe. Recientemente, Minister Tjon conhuntamente cu Minister President Sra. Evelyn Wever-Croes a reuni cu Parlamento Hubenil caminda a scucha varios di e preocupacionnan di e hobennan, cual un di nan ta toca salud mental. A papia tocante e importancia di haci e ayudo aki accesibel pa alumnonan di scol tambe. Asina e Mandatario a expresa cu di parti di Ministerio di Husticia y Asuntonan Social sigur lo kier percura pa salud mental no ta un taboo mas, y asina brinda e ayudo necesario. Pa e motibo aki, otro siman hunto cu demas instancianan cu ta encarga cu salud mental, manera FMAA, SPD y RESPALDO lo firma un MOU caminda lo percura pa e procesonan aki ta mas alinia na otro pa di e forma ey por brinda un cuido di calidad mas halto y asina tambe percura pa e cuido aki ta uno mas accesibel.