Diabierna ultimo Minister di Asuntonan Economico y Desaroyo Sostenibel, Mr. Geoffrey Wever, a cuminsa reparti un carta di informacion y invitacion na comerciantenan den area di Caya G.F. Betico Croes, pa nan por participa na un serie di evento di pasco na estilo “shopping nights”.
Ta asina cu durante e fechanan December 20, 21, 22 y 23, Gobierno di Aruba ta bai organisa un evento den Caya Betico Croes, invitando entre otro comerciantenan artesenal, culinario y tambe entretenedornan pa participa. E meta ta pa crea un ambiente familiar y ameno den espirito di pasco, pa asina stimula comunidad tambe pa shop localmente.
Actualmente no ta e situacion di mas facil pa nos comerciantenan, pero cu esaki Minister Wever kier demostra e compromiso di Gobierno di Aruba pa promove y stimula comercio na Aruba. “Esaki ta djis e comienso, pero un paso importante pa cuminsa na purba rebiba actividad den nos centro di cuidad”, segun Minister Wever.
