Dia 7 di december ta Dia Internacional di Aviacion Civil. Minister di Transporte, Integridad, Naturalesa y Asuntonan di Adulto Mayor, Ursell Arends, ta extende su palabranan di felicitacion na tur e profesionalnan trahando den e industria importante di aviacion. E bon trabou di e profesionalnan aki ta importante, cargando e sector di Turismo di Aruba, cual nos economia ta depende asina hopi riba dje.
Awor den temporada di pandemia aviacion ta keda hunga un rol importante, no solamente pa trece turista Aruba pero tambe pa segura suministro di nos productonan di primera necesidad manera cuminda y remedinan (“supply chain”).
“Nos ta reconoce e rol importante di Directie Luchtvaart den e mundo di aviacion, hunto cu stakeholdersnan principal manera AAA N.V., ANSA N.V., DMA, IBSL, y tur aerolinea, compania di ground handling, compania di mantenimiento y tur demas stakeholdersnan na aeropuerto”, ta palabranan di Minister Arends, kende ta expresa asina su gratitud y aprecio na tur esunnan cu ta haci posibel pa e trabou den aviacion wordo haci optimalmente y cu e nivel mas halto di seguridad.
