Ayera anochi Wardakosta a detektá un kontakto sospechoso den awanan teritorial di Kòrsou. Mesora e Sentro di Reskate i Kordinashon a dirigí un unidat pa bai tira un bista na e lokalidat. Na yegada e tim di Wardakosta a enkontrá 33 persona indokumentá, di kual 11 hende muhé i
22 hende hòmber na bordo di un boto. Na bordo e agentenan di Wardakosta a enkontrá tambe diferente bestia eksótiko. E personanan a ser hiba na e pir di Wardakosta na Parera kaminda e tim multidisiplinario konsistiendo di miembronan di Wardakosta, GMN i Polis tabata presente pa hasi e kontrolnan nesesario. Despues di e kontrolnan e indokumentadonan a ser entregá na Polis pa sigui ku mas investigashon. E animalnan eksótiko, un makaku, un morkoi i 5 prichichi a ser entregá na Veterinaire Dienst Kòrsou.
