“Pa sigui hiba e Pais dilanti Aruba mester di e mesun union, determinacon y vision cu a conduci na Status Aparte”
ORANJESTAD – Diamars 23 di november a tuma luga e Conferencia 35 aña Status Aparte, Aruba ta di nos tur. E conferencia a conta cu presencia di Gobernador y ex Gobernador, Ministernan, Parlamentarionan, Presidente di Parlamento y diferente ex politico y personanan cu tabatin un rol importante den e 35 aña cu Aruba tin Status Aparte.
Durante apertura di e conferencia, Prome Minister Evelyn Wever- Croes a enfoca riba e lucha cu a conduci na e logro di Status Aparte, riba loke cu no a logra ainda y e futuro di Aruba.
Un palabra pa tipifica e lucha cu a Aruba a hiba 35 aña pasa pa por a drenta den e fase nobo como pais autonomo ta: union. Union den amor pa nos pais, y union den amor pa su simbolonan di identidad, nos himno, nos bandera, nos moneday nos escudo, Premier Wever – Croes a splica.
E lucha a wordo tipifica tambe pa determinacion y vision. Vision pa sa unda kier bay cu Aruba y determinacion pa logra esaki. Aruba a conoce lidernan grandi y visionario cu a hiba e lucha y despues a sa di desaroya nos pais den e Aruba cu awe nos ta biba aden.
Den e dianan prome cu e conferencia di diamars, Prome Minister a reuni cu varios personahe cu a hunga un papel importante durante e lucha pa e Status Aparte y despues durante e desaroyo di Aruba como pais autonomo. Premier a reuni cu sindicalistanan di e tempo aya, miembronan di prensa di e tempo aya, politicinan, y esnan cu tabata conseha e politiconan di e tempo aya te cu e tempo aki y tambe a reuni cu e secretarionan di Conseho di Minister.
“Mi kier a scucha di na, con nan a experiencia e epocaimportante aki den nos historia y nan a comparti anecdotanan. Tambe nos a reflexiona riba e periodo nos dilanti, y kico nan ta conseha gobierno”.
Puntonan importante cu a bin dilanti for di e combersacionnan aki segun Prome Minister a splica, ta cu despues di e lucha duro pa Status Aparte, a pone tur esfuerso den desaroya Aruba su economia hopi lihe, haciendo Aruba un pionero den e region, especialmente riba turismo.
Preguntanan importante cu ta bin dilanti ta, si a enfoca suficiente riba e formacion di nos hendenan pa defende e autonomia y democracia di nos pais. Nos a forma nos ciudanonan pa pensa y actua autonomo suficiente? Nos a enfoca riba formacion pa cada ciudadano di nos pais conoce e contenido real di e autonomia, y consecuente con nos mester lucha pa mantene?
Prome Minister: ‘Tin ta pensa cu si y tin ta pensa cu no. Ami no tin e contesta. Loke si ami sa, ta cu e Status Aparte a yuda nos pais y nos hendenan hopi. Y si tin aspectonan cu nos mester traha mas duro riba dje, e tempo ta awor pa nos hacie’.
Aruba a desaroya den un pais pionero den nos region y den mundo pa nos turismo, nos cordialidad y e stabilidad di nos pais ta atrae bishitante di henter mundo. Aruba a logra hopi den 35 aña, pero tin cos cu nos no a logra ainda. E periodo nos dilanti lo ta dirigi riba e areanan aki, por ehempel:
(1) Formacion di nos hendenan, pa e ciudadano di nos pais ta mas autonomo,
(2) Prepara miho pa futuro, pa un Aruba fuerte y resiliente y pa duna un dimension nobo na nos democracia,
(3) Den e desaroyo den e periodo di recuperacion nos dilanti, proteccion di naturalesa ta hopi importante
(4) Y nos mester documenta e historia di nos lucha y inclui esaki den curriculum na scol, sino e historia ta bira un storia.
Prome Minister a sigui bisa: “35 aña despues di nos Status Aparte, saliendo di e pandemia mundial Covid 19, mi ta compara Aruba cu un barco nabegando den lama bruto den olanan grandi. Ainda e lama ta bruto. Pero inspira pa e lucha pa nos Status Aparte, mescos cu e tempo ey nos forsa tabata nos union, determinacon y vision. Awor ta e mesun union, determinacon y vision lo ta nos forsa pa pasa den e lama bruto, drenta lama calmo y yega nos destino, Premier Wever – Croes a termina bisando.
