Calabas/Kudawecha – Cientificonan tur parti di mundo ta siña un cos prome: ‘Meten is Weten’! Shonnan amante di bon domino, diasabra awor 22 di november, cuminsando pa 7’or di anochi, ta bay tin chens pa un y tur pasa na e unico y mundialmente conocido Domino Square Gardenna Calabas pa bin midi si e rumornan cu ta coriendo rond ta berdad, es decir, cu e famoso ‘Snor’ Perez tin un walk in closet yen di sapato blanco! Asina pues nada menos cu e ‘beruchte’ Chelo Loco a declara den un intrevistaexclusivo! Segun Chelo, si Snor su cashi ta bashi, anto diasabra awo Team Chelo Loco lo yena esaki cu varios modelo di sapato blanco marca ‘Vloer-Shine’!
Si señores amante di domino di ‘high tension’. E gran y clasico encuentro entre TEAM SNOR contra TEAM CHELO LOCO ta bay tuma luga diasabra awo 22 di november pa 7’or di anochi n’e unico Domino Square Garden na mundo. Un bataya cu niun amante di domino no por keda sin presencia! E bar y cushina lo ta peng-peng di cerbes friu friu y pasapalonan cayente cayente. Han, e embahador di Peking, lo percura ‘in person’ pa cada guest pasa un anochi inolvidabel. Shonnan, e wea ta na candela! Cos ta bay ta di ‘rompe-nervios’ diasabra aki 22 di november cuminsando pa 7’or di anochi na e Domino Square Garden na Calabas! Yegaaa!
