ORANJESTAD – Awe mainta, Minister di Husiticia y Asuntonan Social Sr. Rocco Tjon a bishita e Centro pa Hoben y Famia riba nan prome aniversario desde e apertura virtual di Centro pa Hoben y Famia na Wayaca, pa asina habri e “Siman di lantamento di mucha”. E centro aki ta simbolisa e trabounan colectivo di diferente instancia cu ta dirigi nan mes riba prevencion y ayudo trempan, y ta ofrece nan servicio fisicamente tambe for di un solo localidad. E organisacionnan aki kier hiba un maneho pa e añanan nos dilanti pa traha den un cooperacion mas estrecho.

Na aña 2018 a introduci na Aruba e “Siman di Lantamento di Mucha”. Gobierno a scohe e siman aki mirando cu e ta inclui e fecha 20 di november cual ta “Dia Internacional di Derecho di Mucha”. Aruba ta uni su mes na e conmemoracion mundial aki unda cu mundo henter ta para keto na e momento historico cu a tuma lugar 32 aña pasa, y na unda e lider mundial a yega na un acuerdo, den un asamblea general di Nacionnan Uni, cu globalmente lo proteha e bienestar di tur muchanan pa medio di e Tratado di Derecho di Mucha.

Na aña 2001 Aruba tambe a firma e tratado aki, haciendo e compromiso pa proteha e mucha di un forma mas completo posibel, pa medio di e diferente articulonan specifica den e tratado. Den e mesun aña, Gobierno di Aruba a instala e Comision Nacional Derecho di mucha pa percura cu e cumplimento di e Tratado ta sosode na un forma coordina y eficiente. E comision “Derecho di mucha” ta consisti di ocho organisacion gubernamental y dos organisacion no-gubernamental.

Banda di esaki a instala un Taskforce pa Derecho di mucha na april di aña 2014, cu ta consisti di un representante di tur seis isla den Reino y Hulanda. Den e plan di trabou di Taskforce a delinea algun aspectonan cu lo atende, di un forma colectivo, e dererechonan di mucha. E trabounan aki a conduci na un MOU cu tambe a ser firma riba e fecha di 20 di november di aña 2018. Den cual a formalisa e compromiso di e paisnan pa e metanan stipula.

Pa e motibo aki mes, e Mandatario ta enfatisa e importancia di lanta nos muchanan den un ambiente di amor y siguridad. Durante e siman aki lo tin diferente actividadnan, tanto pa profesionalnan, mayornan y muchanan. E calendario di actividad ta posibel danki na diferente organisacionnan cu ta promove e vision pedagogico y e derechonan di mucha na Aruba. E tarea di lanta un mucha ta uno compleho pa motibo cu cada mucha ta asina unico y cu su mesun necesidadnan. Pues como mayor tambe no tur ora e ta facil pa por stimula e mucha den su capacidad y yud’e den tur area di su desaroyo.

Por ultimo e Mandatario a expresa cu di parti di Gobierno ta trata lo miho posibel pa por ofrece servicionan gratis cu por sostene mayornan den e responsabilidad importante aki. Pero tambe pa stimula cooperacionnan manera esunnan cu ta tuma lugar den e “Siman di lantamento di mucha”.