Pronto website di FASE ta cambia pa www.arubakiertraha.com
Recientemente Minister di Husticia y Asunto Social y Minister di Labor, Energia & Integracion a anuncia cu FASE ta termina awo 1 december.
Minister Glenbert Croes for di un principio a anuncia cu FASE ta termina December 2021 y corectamente, e ultimo pago lo ta alrededor di mediado di December di e aña aki. Den mesun rosea Minister Glenbert Croes a papia di e posibilidad di TIO pero cual Hulanda no a aproba pa motibo cu den cuadro di Landspakket ambos pais, esta Hulanda y Aruba, ta trahando riba un ‘sociaal vangnet’.
Mientras tanto economia di Aruba ta den pleno recuperacion. Companianan local ta buscando hende pa traha. Na mas di un ocasion nos por a tende comercio expresa cu nan mester di trahado pero cu no ta hayando.
E pandemia a causa un cambio drastico den nos bida personal y profesional. E COVID a afecta henter e structura y fibra di nos bida. Pero sea nos ta rindi of nos ta lanta para bek riba tur dos nos pianan. Aki ta unda Aruba Kier Traha ta importante, pa yuda nos recobra nos animo y energia bek mediante diferente cursonan di recapacitacion.
E website www.fasehelpdesk.com lo bira www.arubakiertraha.com y riba e website aki por registra pa cursonan di recapacitacion (her-, om en bijscholing) cu lo por yuda bo y guia bo den direccion di un trabou y funcion nobo.
Pa jobmatching e invitacion ta na bo persona pa registra riba www.dpl.aw of pasa personalmente na Engelandstraat of na DPL SN. Mientras tanto, riba facebook page di FASE Helpdesk y di Departamento di Progreso Laboral DPL tin hopi vacatura y oportunidad pa trabou cu ta wordo comparti. Solicita!
