ORANJESTAD; Recientemente Minister Endy Croes a reuni cu sra. Sharuska Den Dunnen- Dabian kende ta encarga na momento aki cu Dienst Publieke Scholen Aruba ‘DPS’.
Tabata un reunion hopi amplio unda a repasa diferente inkietudnan entre otro; infrastructura di algun scol; e dak di scol basico Washington, un trailer pa SPO Santa Cruz, cura di Emma School mester wordo drecha pa siguridad di e scol y renobacion di ful e sistema electrico di e scol.
Minister Endy Croes bisa cu a dedica hopi tempo na parti di colecta data y conecta DPS a traves di un sistema moderno cu tur su scolnan. Minister Endy Croes a pidi cooperacion di e staf di DPS pa un proceso cu pronto e lo bay inicia pa trece mehoracion den e maneho total den DPS.
Tabata un bon reunion Minister Endy Croes a scucha cu atencion tur puntonan cu a keda treci dilanti y e prioridadnan pa cu e tereno di enseñansa. Minister Endy Croes su deseo y empeño ta pa soluciona problematicanan mas tanto posibel, crea espacio pa trankilidad, paz y mehoracion den e tereno di Enseñansa.
