Tabata riba e fecha di 6 september 2017 cu nos hermana isla Sint Maarten a wordo azota pa horcan Irma y despues pa horcan maria. Sint Maarten tabata den un situacion di calamidad, sin coriente, awa y sin orden publico.
Tabata e momento ey cu e Colegio di Altocomisarionan di polis di reino hulandes a dobla manga, traha hunto y a manda un cantidad di polis pa hunto duna un man na Sint Maarten. For di Aruba a manda 30 polis cu voluntariamente a dicidi pa duna un man y re-stablece orden publico na Sint Maarten.
Awe despues di 2 aña nos a mira cu yudansa di e 30 polis tabata exitoso, Sint Maarten ta lantando bek riba pia. Y den e ocasion special aki minister di defensa hulandes a reconoce e 30 polisnan aki pa nan balentia y esfuerso cu un condecoracion real.
Na Mareniers Kazerne Savaneta a organisa un ceremonia special na unda tabata tin presencia di Vice-presidente di Parlamento Sr. Allan Howell, Minister di Husiticia Andin Bikker, Waarnemend Procurador Generaal Sr. Deutekom, Comandante di Mareniers Kazerne Savaneta Sr. Art Beekhuizen y Altocomisario di Polis Sr. Andrew Hoo.
“Nos por mira bek cu e agentenan policial di Aruba a haci un tremendo trabou, e medaya ta un reconocimento na unda a para schouder cu schouder cu e militarnan durante e trabaonan grandi di ayudo” segun e comandante.
Mi ta orguyoso cu 30 polis di Aruba cu no a pensa dos biaha y a dicidi cu ta yuda nos isla ruman cu ta den un necesidad grandi. Esaki ta loke nos ta para pe, pa yuda e ser humano y pa salvaguardia e orden publico” segun e Altocomisario di polis.
Presencia di amigonan, colega y famia a mira e ocasion special aki dedica pa nan sernan keri. Comunidad por ta orguyoso con maske chikito nos isla ta. Nos tin polisnan capacita y profesional para cla y prepara pa yuda nos ser humanonan den reino hulandes den cualkier calamidad. Union ta haci forsa y denunion hunto nos por logra mucho mas
