Durante luna di oktober, e minister di Asuntonan pa Adulto Mayor, Ursell Arends a duna reconocemento na baluartenan y tambe bishita diferente organisacionnan caminda por a wak e trabou incansabel cu profesionalnan ta desplega den e sector di cuido pa Adulto Mayor. Durante su bishita, e minister a keda hopi satisfecho pa e oportunidad di scucha loke ta biba cerca e profesionalnan y e Adultonan Mayor.
Minister Arends a inicia e luna di oktober cu reconocemento di dos baluarte, Paul van Niel y Eric d’Arnauld. Ambos persona a contribui hopi pa nos pais ariba terneo di enseñansa, deporte, area social y specialmente den promove calidad di bida pa Adultonan Mayor.
Durante e webinar ‘Traha hunto pa un mihor bienestar pa adulto mayor’ cu a wordo organisa pa Club Kibrahacha, Minister Arends a intercambia di pensamento cu e diferente profesional ariba e aspecto di cuido integral y e necesidad pa actividadnan organisa.
Grupo Nucleo tambe a organisa un anochi cultural na Cas di Cultura. Durante e presentacion di diferente grupo di Adulto Mayor, minister Arends por a experencia tur e talentonan cultural cu nos Adultonan Mayor a comparti den un bunita show.
Durante bishita na SABA, minister Arends por a wak e trabow incansabel cu profesionalnan ta desplega den e sector di cuido pa Adulto Mayor, algo cu tin mas necesidad den comunidad di Aruba cu mayoria hende ta pensa.
Siguientemente minister Arends a bishita un presentacion di Grupo Movimento ta Bida. Durante e mainta minister a precencia presentacion di dokter Jaime Falconi y dokter Maritza Ordoñez. Tabata un mainta hopi informativo cu participacion di un grupo grandi di Adulto Mayor.
Minister Arends a bishita dos projecto di vivienda di FCCA pa Adulto Mayor. Ambos projecto, di Savaneta y Cunucu Abao ta ehempel di projecto cu mester sigui stimula, caminda Adultonan Mayor por biba serca di otro den harmonia, cu cuido centralisa preventivo y integral y amenidadnan special pa mobilidad limita – un problema grandi den nos comunidad. Minister kier pa sigui stimula e plan di vivienda pa Adulto Mayor den e maneho di ‘Home Sweet Home’.
Minister Arends durante henter luna di oktober a pone atencion ariba e temanan cardinal: cuido integral, transporte accesibel, vivienda pagabel y sigur, combatimento di soledad, actividadnan pa promove salud y calidad di bida. “Ricibiendo feedback di tur e organisacionnan involvi ta fortifica nos meta y nos plan di maneho. E ta bon pa sa cu nos tur ta riba e mesun pagina”, Minister Arends ta opina. “E ora pa traha ta awo, nos Adultonan Mayor nan futuro ta awo”.
