Durante conferencia di prensa di Gobierno di Aruba dialunamainta, Prome Minister Evelyn Wever-Croes a anuncia e ‘Conferencia 35 aña Status Aparte – Aruba Ta Di Nos Tur’. E aña aki ta conmemora cu 35 aña pasa Aruba a haya su Status Aparte dentro di Reino Hulandes. Dia 1 di Januari 1986, Aruba a drenta e Status diferente aki y esaki ta locual cu a contribui na e exito di Aruba. Diferente Gobierno y Parlamento, un tras di otro a contribui na e exito cu awe nostur ta biba aden, nos dushi Aruba.
Na comienso di e aña aki, danki na Minister Xiomara Maduro como Minister di Cultura, a transmiti un serie di programacortico titula ‘35 aña Status Aparte – Un lucha cu a marcahistoria’. Durante di e programanan aki señor Nelson Oduber a brinda informacion riba diferente parti importante di e lucha di Status Aparte y kico esaki a nifica pa Pais Aruba.
Prome Minister a duna di conoce cu lo cera e aña aki cu un di dos conmemoracion di e importante acontecimento historicoaki cu un otro evento informativo y educativo. Gobierno di Aruba ta organisa un Conferencia ‘35 aña di Status Aparte – Aruba Ta Di Nos Tur’, durante cual lo reflexiona riba e 35 añanan cu a transcuri, lo analisa unda nos tabata, unda nos ta y unda nos lo kier yega como pais. 35 aña di Status Aparte a trece nos caminda cu nos ta awo pero ta hunto nos mesterdetermina con nos ta duna contenido na e futuro di Aruba y suStatus Aparte.
Lo elabora riba kico Status Aparte a nifica pa Aruba, kico tur nos a logra y con nos ta awor. Tambe lo analisa con Aruba a desaroya riba tereno economico, social, educacional y cultural.
Lo tin como invitado representantenan di diferente sector y varios ex-mandatario cu a ocupa posicionnan importantedurante e ultimo 35 aña cu a transcuri.
Prome Minister a accentua tambe cu e medidanan di COVID19 ta vigente ainda, p’esey e invitadonan lo mester ta limita. Lo pasa e Conferencia via medianan tradicional y social pa asina henter Aruba por sigui e Conferencia ‘35 añaStatus Aparte – Aruba Ta Di Nos Tur’ cu lo tuma luga diamarsdia 23 di november di 9’or pa 12’or di merdia. Pronto lo dunamas informacion di esaki. Keda pendiente.
