Minister pa asuntonan di Adulto Mayor, Ursell Arends haci un bishita na Fundacion Cas Marie. Cas Marie ta un pasadia pa Adulto Mayor cu demencia.
Durante un encuentro hopi ameno cu e directiva y e coordinadora di Cas Marie Sra. Lisette Does, minister Arends a haya un splicacion amplio di e tareanan cu e fundacion ta desplega pa personan cu demencia.
Durante su bishita, minister Arends tabata tin e grato placer di cera conoci cu e ‘tata’ di Cas Marie señor Boy Escalona. Cas Marie ta un soño cu Sr. Escalona a haci bira realidad 15 añapasa. Sr. Escalona a comparti su propio experencia cu su esposa q.e.p.d. cu na un edad hopi jong a haya demencia. Esaki a sirbi como estimulo pa Boy por por realisa e proyecto di Cas Marie. Cu hopi esfuerso, fe y perseverancia Boy su soño bira realidad.
Sr. Escalona a splica cu un persona cu demencia mester di un pasadia na unda e Adulto Mayor por sinti su mes na cas. P’esey, na momento cu e fundacion a haya oportunidad pa escoge e localidad na Savaneta pa realisa e proyecto di Cas Marie, esaki tabata un logro hopi grandi. Cas Marie a bira e lugar ideal cu ta cumpli cu e necesidad pa personanan cu demencia.
Señora Does a splica cu e edad di personan cu dementia ta sigui baha. Cada bes ta encontra cu caso di personanan di edad basta hoben cu tin demencia. Alabes Sra. Does a subraya cu e cantidad di persona cu demencia ta creciendo rapidamente na Aruba. E fundacion ta mira e nececidad pa amplia nan capacidad pa asina nan por cumpli cu e demanda.
Cas Marie ta maneha e proyecto ‘Demencia Café’. Cu e proyecto aki Cas Marie ta organisa encuentronan informativo ariba e tema di demencia. Ta importante pa informa y duna guia ariba e tema dificil aki.
Minister Arends a haya un recorido den e edificio di Cas Marie. Minister a experencia un celebracion masha bunita cu e bishitantenan, e staff y boluntarionan di Cas Marie. Minister Arends ta hopi agradecido pa cordialidad di e famia di Cas Marie. Alabes Minister Arends ta aplaudi iniciativanan asina. Den su maneho integral e minister lo enfoca ariba e bienestar y cuido di nos adultonan mayor, incluso esnan cu por desaroya demencia durante nan bida.
