ORANJESTAD: Diabierna ultimo Minister di Enseñansa y Deporte Endy Croes a forma parti di e parada organisa pa Mon Plaisir Basis School en conexion cu e apertura di e siman di festival di buki pa mucha cu e aña aki ta hiba como tema: Biralocual bo kier bira, scoge e profesion cu bo kier.
E apertura a tuma luga den forma di un parada den unda cu e diferente profesionnan a pasa den auto y saluda e muchanan. Pa menciona algun di e profesionnan cu tabata presente; polis, militar, doño di tienda, Setar, truk di chica pos y mucho mas.
Minister Endy Croes hunto cu colega y alabes Prome Minister di Pais Aruba Evelyn Wever -Croes a keda sumamentecontento di por a forma parti di e parada y ta spera di por a inspira un mucha. Minister Endy Croes a felicita Mon Plaisir Basis School cu e bunita iniciativa y alabes ta desea tur scolhopi exito cu e siman di festival di buki pa mucha.
