ORANJESTAD – Diabierna merdia Mininster di Husticia y Asuntonan Social Sr. Rocco Tjon a presencia firmamento di e convenio “Dutch Caribbean Mental Health” entre socionan; Aruba, Boneiro, Curacao y St.Maarten, pa loke ta un operacion basa specificamente riba e tematica di salud mental y adiccion. Esakinan ta topiconan cu tin hopi atencion den pueblo y di parti di Ministerio di Husticia y Asuntonan Social tambe ta haya su debido atencion, mirando e necesidad cu tin pa esaki.
Respaldo Aruba conhuntamente cu Mental Health Caribbean Boneiro, GGZ Curacao y Mental Health Foundation St. Maarten a firma un convenio di cooperacion caminda hunto lo bay percura, pa riba diferente topiconan por tin un colaboracion mas di serca cu otro specficamente riba e tereno di educacion y cursonan na personal pa di e forma aki percura pa no solamente brinda un miho calidad pero tambe percura pa amplia e opcion di carera pa e personal cu ta traha den e area aki.
Segun Minister Tjon, un otro topico cu e convenio aki lo traha hunto riba dje ta e parti di calidad y desaroyo, no solamente riba e contenido di e materia aki pero tambe e aspecto di “bedrijfsvoering” cu ta hopi importante, pa motibo cu ora ta trata e materia aki e gastonan ta hopi halto. E mandatario a remarca cu ‘si nos tur traha hunto riba e topiconan aki, na final di dia e lo por combini no solamente e profesionalnan cu ta traha den e profesion aki pero tambe e cuido cu nos por brinda na e clientenan’.
Ademas di esaki, tin mas proyectonan cu lo wordo ehecuta bou di e capa di e convenio aki como por ehempel; E-health, proyectonan pa intercambia informacion cu otro, pero tambe na mes momento salvaguardia e parti di privacidad, pues e parti di “cybersecurity” cual tambe ta hopi importante.
E mandatario a sigui splica, cu e cuater paisnan aki y nan instancianan lo colabora mas di serca cu otro pa e parti legislativo tambe. ‘Ta asina cu tin diferente leynan cu lo mester wordo adapta of kisas introduci pa por atende miho cu e parti di salud mental y adiccion, pues pa e motibo ey tambe ta importante cu por medio di e convenio aki lo por uni tur e expertisionan hunto pa asina por mitiga retonan’.
Por ultimo, Minister Tjon a enfatisa cu dos persona for di Ministerio di Husticia y Asuntonan Social tambe a keda apunta pa reuni semanalmente cu tur e stakeholdersnan local cu e meta pa prome cu fin di aña, yega na un acuerdo di cooperacion entre Respaldo, FMAA y SPD pa di e forma ey brinda un miho cuido pa loke ta salud mental y adiccion na Aruba. Dentro di poco, a base di palabracionnan existente, lo bin un centro caminda tur e stakeholdersnan local aki literalmente lo bay wordo ubica hunto, pa asina por traha mas serca di otro y asina brinda un miho cuido.
