Den 27 dia di trabou Minister Endy Croes a logra resolve varios puntonan importante den Enseñansa y Deporte.
ORAJESTAD: Durante conferencia di prensa diaranson ulltimo, Minister Endy Croes encarga cu Enseñansa y Deporte a elabora cu den 27 dia di trabou, 10 dia den fin di siman un total di 37 dia e la traha tur dia sin un dia liber pa busca solucion y resolve e inkietudnan y problematicanan
Instructornan di landamento: Un di e problemanan cu a wordo resolvi ta e instructornan di landamento cu dia 14 di october a inicia cu les di landamento bek na scolnan basico y si tur cos ta bon dia 24 di october ultimo nan a cobra nan salario a base di nan contract anterior.
33 alumno di EPB: E mandatario a sigui splica un otro problematica cu a wordo resolvi ta e 33 alumnonan cu no por a cuminsa scol na EPB. Nos a scucha tur conseho y a tuma e decisionan necesario y desde 11 di october a habri dos extra klas; un na EPB Oranjestad y e otro na EPB San Nicolas pa e asina e 33 alumnonan por a cuminsa scol bek.
Emma School: Minister Croes a indica cu un otro inkietud cu a encontra ta e WIFI di Emma School. Nos a atende cu esaki y cana e proceso corecto y e WIFI tambe a keda regla. Minister Croes a sigui bisa cu e la reuni cu cabesante di Emma School sra. Joselyne Oduber-Jacobs kende tin 41 aña eherciendo trabou na Emma School, a scuche cu hopi atencion e diferente otro dolornan chikito cu ta biba serca nan. Nos a pone nan riba nos lista di inmediatamente y a cuminsa traha riba nan. Pa menciona algun; tin mester un revision di e sistema di coriente pa despues por bin na airco, otro punto cu mester di atencion ta e cura pa sera esaki pa siguridad. Un punto hopi importante cu a wordo resolvi desde 21 di october recientemente a pone un instructor bek hiba bus, pues un persona adecua pa tur mainta cinc’or y mey riba e bus pa busca e muchanan den diferente districto y hibanan scol.
Comision Werksters di SKOA: Minister Croes a indica cu siman pasa na Bestuurskantoor e prome reunion a tuma luga cu comision. E comision a wordo forma door di un Ministerraad besluit (MB) y a haya e tarea pa alrededor di 30 dia presenta conseho y solucion concreto.
E comision ta consisti di diferente departmento entre otro; representante di Departamento di Finanzas, Departamento di Recurso Humano (DRH), director di Directie Wetgeving en Juridische Zaken (DWJZ), director di Centrale Accountantsdienst Aruba (CAD), Stichting Katholiek Onderwijs Aruba (SKOA) a manda tres representante entre nan un abogado y di Ministerio di Enseñansa y Deporte a apunta dos persona: un hurista di ministerio,y externo un register accountant. Como Minister encarga mi a pidi tur esnan cu ta forma parti di e comision pa ta “oplossingsgericht” ban busca solucion, ban debati na un manera sano pa structural na un manera sostenibel soluciona e problematica aki di e werksters di SKOA. E Minister a sigui bisa cu e comision lo mester trese conseho riba e 3 problemanan cu tin riba mesa di SKOA – Gobierno y Gobierno SKOA pa wordo resolvi na un manera structural, duradero y sostenibel cu nos por carga bayendo pa dilanti
OAA, Openbaare Avondleergang Aruba: E mandatario di enseñansa a indica cu e problema di OAA tin su atencion. Tin un ekipo ta trahando riba esaki y nan a reuni cu tur departamentonan manera entre otro Directie Onderwijs, Inspectie Onderwijs y diferente “stakeholders” involvi. Minister a indica cu prome cu fin di e siman aki e lo ricibi e rapport y conseho final con ta e miho manera pa continua na un manera duradero. ‘Nos ta bay continua’, e mandatario a enfatisa, lo resolve e inkietudnan interno y dune un direccion pa e por ta regla y cu sostenibel pa futuro.
“Obhetivo y vision di Gabinete Wever – Croes 2 ta pa soluciona problema. Kisas no ta tur por soluciona mes rapido, pero sigur mi deseo y empeño ta pa soluciona mas tanto posibel y di a manera ey ta crea e espacio pa e trankilidad y paz cu ta buscando pa por Goberna miho pa henter comunidad.
