Riba dialuna 2 di December 2019, lider di partido UPP, como ciudadano, a haci entrega di un keho oficial na Ministerio Publico, unda e ta denuncia minister di Infrastructura y Medio Ambiente, pa actonan di corupcion administrativo y abuso di poder. Esaki despues di a profundisa den e documentonan cu a wordo encontra den e file di  e proyecto di incinerator chikito.

Na principio di e aña aki, UPP a bin tuma nota di acontecimentonan hopi raro relaciona cu e destaho bou man di e incinerator chikito. UPP dia 1 di april 2019 a pidi copia di documentonan al respecto y mester a pasa via un procedura di LAR pa por a haya e copianan di e documentonan (nos ta convenci cu tin mas). Documentonan cu mester a wordo ordena, ya cu esakinan a bin tur bruha.  Despues di a scrutina loke a haya den e documentonan,  Booshi Wever, a dicidi di bay over pa haci un denuncia  primordialmente contra e minister Otmar Oduber, apesar cu nos ta kere cu lo por tin otro personanan cu a colabora of por lo menos a  consenti e minister den loke e tabata kier a haci.

Den corto e denuncia  ta lo siguiente:

* E minister a otorga algo otro compara cu loke ta poni den e destaho. A otorga solamente e incinerator, siendo e destaho bou man tabata involvi mas aspectonan;

* e minister na varios momento a pone leynan y consehonan un banda, djis pa privilegia e compania amigo y sponsor CTC;

* door di diripente involvi Serlimar(cu por cierto NO a participa den e destaho bou man) den henter e asunto na unda solamente CTC a wordo permiti pa e so participa y pues pa e so por a probecha y na unda e minister a haci (mal)uso di su poder pa privilegia un amigo;

* cu e ni e minister, ni DOW y ni Serlimar a duna e otro participantenan e mesun trato, pero mas bien a privilegia e compania sponsor CTC;

* cu dor di e actonan aki e pueblo Arubano obviamente a wordo perhudica tanto financieramente como politicamente;

* cu obviamente tin mas entidad publico y companianan priva cu posibelmente a comete actonan penalmente castigabel;

* ta mas cu obvio cu aparte cu e minister a comete “machtsmisbruik” tanto DOW como Serlimar(posibelmente e Raad van Toezicht di Serlimar tambe) a colabora cu e minister pa previlegia e compania CTC amigo y sponsor di e minister.

Banda di esakinan nos por bisa cu fondonan cu na prome instante tabata destina pa cu un otro obhetivo, a wordo cambia di destinacion, anto riba un termina cortico y otorga por medio di “inkooporder” sin cu a bin e decretonan gubernamental pa por desvia di esakinan, cu normalmente lo mester a sosode “in overeenstemming met de minister van Financiën”. Pa colmo nos a tuma nota cu enbez di a otorga e proyecto conforme e MB, esta un “onderhandse aanbesteding” e minister riba su mes a duna e proyecto “uit de hand” y esaki SIN un MB pa esaki!! Aki un biaha mas e minister a peca contra nos leynan.

Tambe por a constata cu Serlimar, pa coopera cu e minister a acepta un tarea nobo sin cu e esaki ta un di tarea den e ley di Serlimar y es mas cu a bay over na firma contratonan sin cu esakinan como companianan tabata autorisa pe.

E actonan den e denuncia sigur no por keda sin mira luz di dia, y mucho menos no por keda sin ser sanciona. Atravez di e scrutiño di documentonan a yega na e conslusion cu e asunto aki tin tur ingrediente pa por papia di corupcion administrativo y abuso di poder di parti di minister. E denuncia aki ta primordialmente contra e minister Otmar Oduber pero no por kita afo cu tin mas hende of compania involvi pa cual O.M. mester haci e “overweging” cu si nan tambe mester ta parti di e investigacion penal aki.

UPP den su afan y conforme su Statuutnan, pa promove gobernacion drechi, integridad, transparencia,  y finansas publico responsabel y sano y un desaroyo sostenibel y duradero,  ta spera cu por medio di e keho entrega dor di Booshi  Wever O.M.  haci un investigacion profundo di henter e asunto entorno e destaho bou man di e incinerator chikito aki.

Na mes momento nos kier referi aki na e sentencia recien na Corsou den e caso contra 2 ex-miembronan di Raad van Toezicht di Stichting Bureau Ziektekostenverzekering, cu a wordo haya personalmente responsabel pa malversacion y “gesjoemel” cu ta trece un dimension nobo den e aspecto di Good Governance. E sentencia aki ta wordo considera como un alerta pa tur miembro- y ex-miembronan di Raad van Toezciht, Bestuur etc., cu nan rol no mester ta uno complaciente na minister, ya cu ta trata di propiedad di pueblo. Pues desde awor cada miembro lo ta co-responsabel na momento cu actonan coruptivo ta tuma lugar.

Asina nos por mira cu na Serlimar, na unda cu tanto e director como e Raad van Toezicht a tuma decisionnan contra reglanan di Corporate Governance, cu ta poni explicitamente den e ley di Serlimar, a otorga contratonan miyonario na sponsor/amigo di e minister sin ningun clase di destaho of na unda a “sjoemel” durante e destaho.

UPP pa basta tempo a bin ta atende riba e asunto aki y mas cu ta na caminda. UPP a bin ta teima riba e aspectonan ya cu nos meta ta pa logra caba cu e manipulacionnan cu ta bin ta tuma lugar, pero parce cu “NOBODY CARES”. Ta parce cu e propaganda di “WAT KAN KAN, KAN KAN ALLEEN”, a bira “WAT OTMAR KAN, KAN OTMAR ALLEEN!” O sea, “LOKE POR POR, POR SO POR!”

Aruba, 2 december 2019

Booshi Wever

Lider UPP

Brazil 163

•