Diadomingo anochi a drenta informe di un caso di secuestro na Saliña Cerca pero e informante ta na un supermercado mas pazuid, mesora a dirigi un patruya na e sitio. Na yegada di patruya a topa cu varios dama Venezolana den e cas, cu a bisa Polis cu dos homber di “habla Spaño” a drenta arma eyden y a bay cu un suma considerabel di placa cash. Tambe cu a secuestra dos di e hende muhenan den e cas y a bay cu nan den auto. Polis a start cu un investigacion mesora na e sitio.
Un rato pasa a drenta informacion cu a laga e dos mucha muhenan atras banda di hotelnan High Rise, pa cual a busca nan y a hiba nan Warda di Polis pa interoganan. Como cu nan ta papia di atraco arma y cu a bay cu hopi placa, mesora a surgi e pregunta con por tin tanto placa asina den e cas. Tambe a cuminsa investiga dicon tin tanto hende asina bibando pareu eyden y cu ta huur “cambernan” separa den e cas.
Bisiñanan a conta nos na e sitio cu e caso aki tin henter e bario preocupa. Parce cu ta trata aki di un cas ilegal di prostitucion y cu diariamente e bario tin cu soporta autonan cu ta pasa slow eybanda, ta lusa den e casnan den vecindario, ta toca musica duro, hende na harimento duro y mas. E cara di e damanan tambe ta cambia casi diariamente, segun testigonan. A avisa Polis na mas di un ocacion cu e cas ta yena cu muhenan ilegal, pero no a nota cu a haci caso ni a bin controla si esey tabata e caso realmente.
Den un declaracion oficial, Polis mes ta bisa cu e caso ta un poco confuso y cu ainda recherchenan ta investigando si berdad e hechonan ta manera cu e damanan a denuncia na e sitio. Separa di e hecho cu berdad hombernan por a yega na e cas cu mal intencion, e realidad ta mustrando tambe cu eyden tin decenas di hende muhe, mayoria procedente di Venezuela, eherciendo un trabou ilegal riba nos isla. E investigacion lo continua awo pa separa e delitonan for di otro, pasobra e hecho cu tin damanan ta permanece ilegal no ta hustifica e atraco y/of supuesto secuestro, cu si ta un crimen serio!
