“Najaarsnota” 2019 ta prueba cu presupuesto 2019 tawata realistico y a wordo ehecuta responsabel. Diabierna awo Parlamento ta trata e “najaarsnota” 2019. Esaki ta un resumen a base di cifranan imparcial y realistico con Gabinete Wever-Croes a ehecuta Presupuesto 2019. Loke ta resalta mes ora ta cu na 2019 e deficit di 25 miyon florin ta wordo logra y te hasta nos lo conoce un deficit di solamente 19 miyon florin. Esaki ta nifica un “financieringssaldo” di -0.35% enbes di -0.5%, manera stipula.

 

 

PRESUPUESTONAN REALISTICO

 

Na 2018 pais Aruba a conoce un presupuesto supletorio “budget neutral”. Esaki despues cu pa 8 aña Mike Eman no por a logra esaki. E “najaarsnota” 2019 ta indica cu den presupuesto supletorio 2019 Gobierno no lo pidi fondonan adicional. Es decir lo cumpli cu e apoderacion cu nan a ricibi for di Parlamento. Pa 2019 economia di Aruba, segun cifra di Banco Central di Aruba, lo crece cu 2.4%. Sinembargo Gobierno a uza un crecemento di solamente 1% pa sera presupuesto. Esaki ta ilustra e seriedad y grado di responsabilidad cu cual Gabinete Wever-Croes ta goberna.

 

 

DEBE NACIONAL DI PAIS ARUBA

 

Segun e “najaarsnota” 2019 nos debe lo baha pa fin di 2019 cu 29.25 miyon florin. Y na 2020, si compara esaki cu 2019, nos debe lo a baha cu alrededor di 1.24%. E tendencia di rebaho aki lo continua tambe e añanan nos dilanti debi na un maneho responsabel.

 

 

PA CONCLUI

 

Normanan financiero y di personal, manera stipula y palabra tambe a wordo logra. Esaki ta prueba cu Prome Minister sra. Mr. Evelyn Wever-Croes ta mantene su mes na palabracionnan haci y hechonan. Nos ta spera cu Hulanda y particularmente sr.Knops, tambe sa di mantene su mes na hechonan y tuma un decision corecto dia 22 di november.