Famianan a goza di un bunita show di nos talentonan
ORANJESTAD – E aña aki e celebracion di Dia di Betico mester a tuma luga diferente, Comision Celebracion Dianan Nacional institui pa Minister di Cultura tabata creativo y prepara un show spectacular pa duna merito na nos Libertador G.F. Betico Croes.
Manifestacion Cultural Virtual cu nos talentonan
Minister Xiomara Maduro ta trece dilanti cu pa motibo di e situacion actual, no por tabata tin e Manifestacion Cultural riba Plaza Betico Croes, pero e Comision Celebracion Dianan Nacional a prepara un show cu a yega tur cas, un sintonia nacional y hasta hopi hogar den exterior a sigui esaki via nos medionan. Famianan na cas por a disfruta di presentacion di nos talentonan local cu a briya y trece ambiente den cada hogar. E anochi a wordo inicia pa Maestra di Ceremonia e simpatica Sandra Croes kende a yama pabien na henter comunidad cu celebracion di Dia di Betico, un dia caminda comunidad cu alegria y profundo patriotismo a recorda y rindi homenahe na e lider di mas grandi cu pais Aruba a conoce.
E Himno di Aruba, “Aruba Dushi Tera” interpreta pa Kiziah Trimon acompaña pa e maestro Raul Piar y su banda. A sigui cu presentacion di e hoben poeta, Rafael Garcia cu a declama un poesia cu e titulo “Ami no, nos ta e palabra”na honor di Dia di Betico, un hoben talentoso cu na varios ocasion a gana premio Arte di Palabra tanto na Aruba y Curacao. E programa a sigui cu Minister di Finansa, Asuntonan Economico y Cultura Xiomara Maduro anfitriona di e programa cultural kende a hiba un excelente discurso caminda a recorda riba e lucha cu Betico a hiba cu a marca historia. E mandatario ta bisa cu Betico a laga un legado cu e balornan di Determinacion, Perserverancia y Union pa nos y nos futuro generacion y a gradici Betico pa laga nos e herencianan aki y a bisa cu nos lo sigui Betico su ehempel pa enfrenta tur reto y alcansa logronan grandi pa nos Pais.
E prome cantante pa e anochi cultural tabata e hobencita Kitai de Jongh cu ya desde chikito ta participando den festival di canto, cu e presenta den forma fantastico un cancion cu titulo “Den Cura tin Fiesta”. A sigui cu e presentacion di Ivy-Anne Browne cu su voz unico cu e cancion “Mi Aruba Stima”. E programa a continua cu e duo hubenil Georvin y Jorienne Angela cu e cancion titula “Ta nos deber’, cual sigur tabata un reflexion pa cada ciudadano. Otro talento hoben di anochi tabata den persona di Eunice Albertz presentando e cancion “Si e por a papia”, un bunita bos.
Pa varia e anochi a sigui cu un potpourri ‘Aruba Mix” presenta den forma fenomenal pa bailadonan di The Popcorn Dancers.
Aruba tin talento y un biaha mas un y tur por ta testigo di esaki. E anochi a sigui crece den ambiente y presentacion y e hoben cantante Jaydiene Croes a presenta hunto cu Grupo di Betico cu a trece un ambiente y speransa cu e cancion “Ban Briya”.
Un otro impacto di e anochi tabata esun di Jonathan Croes cu su cancion “Bin bij Arubiano”, un genio musical mas di nos pais. Manteniendo e nivel halto di e anochi a sigui cu e cantante hoben femenino Zaina Falconi cu titulo di su cancion “Un Sentimento Profundo”, un interpretacion magnifico.
E anochi cultural manera priminti na inicio a resulta uno unico den ambiente y talento di nos hobennan di e generacion nobo, e famoso guitarista Criss Kross a acompaña Stephanie Albertus cu e inmortal cancion “Ma yega laat”, un grandioso presentacion.
No por a falta e anochi cultural aki sin presentacion di e yiu di tera cu talento excepcional Mitchell Tromp cu e conmovedor cancion “Tanten mi tin rosea” kende a wordo acompaña pa Grupo di Betico. Un cancion emocional cu a toca hopi curazon.
E anochi a wordo clausura cu e banda cu henter anochi a acompaña nos artistanan bao direccion di Sr. Raul Piar. Un mahestuoso repertorio musical cu cancionnan di Aruba presenta pa e talentoso artistanan Chendell Beaumond, Freddy Richardson, Jair Buddy Versprey y Galloway Jr. acompaña pa e bailarinanan di The Popcorn Dancers. Un anochi grandioso y expectacular caminda un programa varia a wordo presenta cu nos talentonan pa asina celebra cu pueblo Dia di Betico den union, igual cu Betico a haci door di uni e pueblo pa logra Aruba su Status Aparte. Minister Xiomara Maduro ta expresa un biaha mas pabien y danki na tur artista cu nan bunita presentacion, danki cu uso di tecnologia y cooperacion di medionan cu e programa manifestacion cultural por e yega den tur hogar. Masha danki na Aruba.tv y High Performance pa un produccion tecnico excelente. Pabien Aruba cu un bunita celebracion di Dia di Betico 2021. Por ultimo un reconocimento special na Comision Celebracion Dianan Nacional pa un trabao sublime.
