Otro proyecto cu Gobierno di Aruba ta desaroyando cu lo trece beneficionan grandi pa nos economía, ta Mercadonan Popular na Oranjestad y San Nicolas, segun Prome Minister Evelyn Wever-Croes a anuncia dialuna mainta den e prome conferencia di prensa di Gobierno di Aruba pa e aña nobo aki.
Prome Minister a duna di conoce cu pa motibo di e pandemia no por a ehecuta e proyecto aki den luna di december. Ta trata aki di dos Mercado Popular mei mei den ciudadnan Oranjestad y San Nicolas. Actualmente ta trahando riba e protocolnan pa asina e proyectonan aki tambe wordo ehecuta pronto.
Durante e conferencia di prensa, Prome Minister a presenta e logonan di Oranjestad Market Place y San Nicolas Market Place cu ya ta cla for di luna pasa.
E mercadonan aki lo ta pa esnan cu por ehempel ta planta mata di flor, medicinal, di berdura of fruta y kier bende locual nan ta planta of nan producto directo na consumidonan. Si bo sa traha balchi di carni of pisca of vegetariano, Johnny Cake etc. bo por bin bende na e Mercadonan.
Si bo ta un cosedo y bo ta cose entre otro lantera pa cushina, cos pa pone weya cayente cu diseño di Aruba of di e temporada di aña, bo por bin bende nan na e mercadonan. E mercadonan popular aki lo bay yuda indirectamente atrae mas hende pa nos dos ciudadnan.
“Mester tene extra cuenta cu e regla y protocolnan di Covid pa evita aglomeracion. P’esey nos lo warda cu e proyectonan aki te ora e cifranan di Covid baha y nos por tene tipo di actividadnan aki. Pronto e comision lo informa tocante di e procedura pa participa na e Mercadonan Popular. Di nos pa nos mes”, Prome Minister a duna di conoce.
