Oranjestad – Minister Xiomara Maduro ta anuncia en conexion cu Dianan di Fiesta, e maneho di tienda y supermercado pa publico. E mandatario ta informa cu riba diabierna 25 di december 2020 y diabierna 1 di januari 2021, no ta permiti pa un negoshi ta habri pa publico.

Pompstations, botica, sector di horeca y tiendanan cu ta situa den un hotel cu tin hotelvergunning si por habri pa publico. E dignatario ta anuncia cu durante dianan di fiesta e maneho di orario ta keda vigente y no ta haci excepcion. E funcionarionan di Departamento di Asuntonan Economico, Comercio y Industria lo eherce control riba cumplimento di e maneho di orario. 

Minister Xiomara Maduro ta informa cu e cambio den maneho di orario e aña aki ta pa motibo di e situacion di pandemia y cu lo no tin bishita di barconan crucero e aña aki. E mandatario ta desea tur comerciante y comunidad en general Feliz Dianan di Fiesta den union familiar.