Dr. Livio Hermans. E tabata un fiel bishitante di biblioteca, tanto na edificio central como na Arubiana. Durante añanan e contacto a converti den amistad.

Un persona sumamente amabel, cu hopi sentimento pa su prohimo. Un persona cu un inteligencia total, tanto den ciencia como den arte. E tin un doctorado den farmacologia y a gradua den medicina. E ta un pianista virtuoso, pero tambe compositor. Musica a hunga un rol hopi grandi cerca Livio durante henter su bida. 

Den nos coleccion na Arubiana nos tin dos obra di composicion propio cu el a regala biblioteca:

Un ta “Missa in lingua latina inspirata a musica Africana” y e otro ta “Baranka, solo y tambu : Kumbu”, composicionnan inspira pa e poesia di Pierre Lauffer.

Na diferente ocasion Livio a duna recital na biblioteca y a yuda organisa recital di piano, den cua e ta demostra su amor y pasion pa musica clasico y musica Antiyano clasico. E ta haci esaki cu un respet grandi pa e compositor y e musica. Un inkietud cu e tabata expresa regularmente ta con por involvi y educa nos hobennan mas cu musica clasico y haci nan conoci cu nos compositornan. 

Su calor humano tabata gui’e na unda cu e bay. Livio tabata gusta bishita su amigonan fielmente y semper e ta hiba algo pa nan cu e sa cu nan ta gusta. Na biblioteca mes e ta gusta parti un chuculati, un cuki of cualkier cos di smaak. E sonrisa cu esey ta trece riba hende su cara ta su danki.

Un gran hende a bay sosega. Staf y personal di Biblioteca Nacional Aruba ta desea yiunan, demas famia y amistadnan di dr. Livio Hermans hopi forsa y consuelo. Cu Livio sosega na paz.