Hopi a puntra con UPP lo a atende cu e deliberacion pa yega na un fiansa cu Hulanda, pasobra ta wordo pretende cu no tabata tin ningun otro alternativa y cu e opcion escohi pa e gobierno tabata e unico caminda. Hopi prome cu e Black Friday nos SI a kere cu tabata tin otro manera y caminda pa cana. No ta COVID so ta e culpabel, pero falta di CONFIANSA den e gobernacion di e ultimo 10 añanan, cu ta motibo principal pakico nos a haya nos den e situacion actual. Ta p’esey Hulanda a pone e condicionnan indecente y absurdo riba e gobierno aki minando ferozmente nos autonomia. No dor di COVID. Tampoco no mester perde for di bista cu ni e gobierno AVPOR ni e gobierno POREDmep a cumpli cu palabracionnan cu nan mes a haci cu Hulanda.

UPP a boga como alternativa, pa enbes di un Organo cu nos no tin influencia riba su maneho manera COHO, pa crea un Organo LOCAL y a-politico cu lo goberna a base di un plan di gobernacion diseña door di condicionnan Hulandes y local, manera tabata e caso di FDA. E condicionnan local lo mester tabata ta e resultado di un Dialogo Nacional na unda tur gremio lo mester participa. E Organo local lo por a duna pueblo y Hulanda un ehempel contundente cu NOS MES por. Ta p’esey nos tabata bisa cu nos mester mustra mundo henter cu nos ta MERECEDOR di nos Status Aparte. UPP a boga pa e opcion di un Organo local hopi prome cu e pandemia, pasobra e situacion socio-economico na Aruba tabata bayendo de mal en peor y Hulanda for di comienso di aña a menasa pa bin cu un “aanwijzing”. Historia lo mustra cu e pandemia a duna e gobierno rosea atrobe. Di un banda a usa e pandemia pa hunga e rol di victima cerca nos pueblo y sigui cu patronahe politico, manipulacion cu cifra, creacion di departamento y prioridadnan robes. Na mesun momento e gobierno a spera riba un tiki indulgencia of compasion Hulandes. Lo contrario a sosode. Hulanda a haci (mal)uso di e oportunidad pa draai mas ainda e “duimschroeven” pa cu Aruba.

Pregunta ta kico lo bay sosode awor cu Aruba a bay di acuerdo? Na prome lugar e 3 musketiers di e COHO hunto cu e RAFT lo bay sirbi e interes di Hulanda y no di Aruba! E dos entidadnan aki ta bodynan COLONIAL mescos cu WIC tabata den pasado. Ta p’esey mas pronto cu ta posibel mester “get rid” di nan y e unico manera pa logra esaki ta dor di mara mannan di e politiconan. NO por permiti pa e mesun partidonan tradicional cu a hinca nos den e cataclismo aki keda “modder door”. Nos no mester lubida cu e gobierno POREDmep a declara di ta pa 80% di acuerdo cu e “landenpakket” den cual tur e venenonan ta hinca. Kico ta para di e 20%? Edad di pension, e dolarisacion di nos economia, e flexibilisacion di LTU y nos leynan laboral?

Pues di e partidonan MEP, POR y RED por spera entre otro cu lo permiti pa mas di 100 mil stranhero haya permiso cu lo bay haci nos AZV hopi “coho”, cu hendenan perde nan trabow zomaar, cu e edad di pension wordo hisa pa 67 aña y cu nos klasnan di scolnan lo ta “sobrecarga”. Mientras cu dolarisacion lo percura pa Aruba bira mas caro y nos pueblo termina den un pobresa, loke ta tumando lugar na Boneiro. Nos no por acepta cu e 3 musketiersnan bay torno na nos ley di retiro. Awor caba e doñonan di trabou a abusa di e situacion di e pandemia dor di purba di kita hende pa loco, incluyendo empresanan estatal. 

UPP lo keda boga pa laga un gabinete A-politico temporalmente y den tempo defini, haya e oportunidad pa enforsa e cambionan necesario pa salbaguardia futuro di nos pais. E gabinete lo mester wordo conforma despues di un Dialogo Nacional na unda tur gremio tin un participacion real y cu mester produci un “PACTO NACIONAL” na unda lo mester percura pa mara mannan di e politiconan dor di introduci e reglanan estricto di Good Governance. Hunto cu e reglanan aki mester bin algun reglanan pa engrandece nos democracia y nos gobernacion! Aki UPP ta pensa e.o. den e Klokkenluidersverordening, Ombudsman, Mededingingsautoriteit y e re-introduccion di e asina yama “Swiss-model”, mientras e Dialogo Nacional mester bira un parti instucionalisa.

UPP ta kere den creacion di un NORMAL NOBO na unda ta busca solucionnan diferente na loke a ser presenta na nos pueblo e ultimo 10 aña. Un gobernacion drechi na unda nos propio organonan ta mustra y demonstra cu nos ta MERECEDOR di nos Status Aparte y mustra mundo henter cu e derecho di autodeterminacion nos merece di tine como ARUBIANO! Pues e escoho ta na pueblo Arubano. Si kier wordo trata como “derde rangsburger” dor di e 3 musketiernan cu e partidonan tradicional ariba menciona a percura p’e, anto vota pa nan. Si e pueblo kier pa Aruba wordo goberna drechi dor di nos propio hende, pero cu e mannan di e politiconan mara, anto mester vota otro.

Y UPP tin e solucionnan realistico y realisabel den nos programa. Pues e Aruba SIN COHO y RAFT ta den bo man! Nos mester bay na ahusta e belanan di e barco y asina bay pa e REBOOT 2.0.,  pa asina nos por realisa e prinicipio di gobernacion drechi cu lo garantisa un futuro briyante pa henter e pueblo di Aruba y NO pa un happy few (F&F). NO KEDA COHO, REBOOT 2.0. TA BO ESCOHO!

Partido UPP

Booshi Wever

16 november 2020