Diahuebs dia 5 di november 2020 partido UPP como partido sin representacion den Parlamento, a dirigi cartanan na Ministerio Publico, sr. Gobernador, sr. Knops (via VNOA), 2de Kamer, Gobierno di Aruba y Parlamento. Motibo pa esaki ta pasobra UPP a tuma nota di intentonan pa esnan culpabel di actonan penal cu a tuma lugar den Parlamento, “get away with crime”. E tactica cu a ser usa, ta pa accentua henter discusion riba interpretacion di reglanan, cu por cierto a ser viola sin misericordia y sin cu un solo hende ta wordo poní responsabel. Al contrario te hasta sr. Ady Thijsen ta ser elogia pa su coleganan den Parlamento y pa e Minister Presidente sra. Croes. Te hasta e ta wordo poni riba un pedestal y su actonan contra nos leynan y custumbernan ta wordo pa colmo considera como un acto di grandesa! Tur e show aki ta wordo haci dor di e “spindocters” pa desvia atencion riba e actonan penal cu de facto a wordo cometi. Riba tipo di e “misdrijven” (crimen) asina tin un maximo castigo di 6 aña, pues un acto penal hopi severo.
E mision di UPP ta pa presenta nos pueblo un alternativa realisabel y sostenibel. E pueblo mester por bay sinti cu e NORMAL NOBO ta conta pa e gremio politico tambe. Loke na e momentonan aki no parce e caso. Na momento cu nos Parlamento no ta duna e ehempel di cumplimento di ley y comportacion civico, kico nos por spera e ora di esnan cu den weekend ta trata na kibra regla di samenscholing?
Prueba di e actonan penal por ser mira den un grabacion haci durante e reunion den Parlamento. Diferente parlamentario ta involucra, pero particularmente sr. Ady Thijsen a hunga un rol prominente. Ela permiti pa e actonan penal tuma lugar y na cierto momento te hasta a participa den esaki. Un otro Parlamentario, segun por ser aprecia riba e grabacion, cu tambe tin un rol prominente ta sr. Hendrik Tevreden y no cabe duda e rol di e lider di fraccion di MEP, sr. Rocco Tjon cu a laga tur e actonan fraudulente y coruptivo aki pasa su dilanti sin hiek. E rol di sr. Alan Howell tambe ta hopi importante y cuestionabel. E ta esun cu sa cu e NO tabata den sala ora di votacion!!
No cabe duda cu e actuacion pasivo di e otro miembronan di fraccion di tanto MEP como POR tambe mester wordo investiga. Mescos e ministernan Bikker y Romero kendenan tabata presente y tambe ta testigo cu sr. Howell NO tabata den Parlamento, pero a scohe pa no para e miembronan di MEP y POR comete e acto penal aki. Esaki tambe ta ser considera un acto penal. Nan mester por tabata sa cu e documento cu lo ser usa ta procedente di un maniobra ilegal. Last but not least e Minister Presidente cu ta conocedor di e grabacion y apesar di esaki ta para 100% tras e Presidente loke ta nifica cu e ta apoya y sostene fraude y corupcion. Nada nobo mirando con ela y ta apoyando tur e actonan criminal di e Scorpion.
UPP a mustra riba e hecho cu varios ambtenaarnan tabata presente cu a wordo “meegeslepen” den e actonan bochornoso aki.
UPP sa cu tin 2 denuncianan entrega y a pidi Ministerio Publico pa yama TUR esnan presente pa nan duna nan version y alabes pa haci uso di tur imagennan di e camaranan cu tin den Parlamento. UPP a manda carta pa e instancianan ariba menciona pasobra aki nos tin di haber di un acto hopi serio y ta mustra cu kier wordo manda pa “doofpot” loke UPP kier evita bou di tur cicumstancia. Un di e aspectonan mas importante den e principio di Good Governance ta ACCOUNTABILITY esta cu un of mas hende mester responde y carga e consequencianan di su actonan cu definitivamente no por ser tolera.
Nos a mustra tambe riba e rol di sr. Gobernador cu den opinion di UPP mester por a considera e actonan aki “BEHOORLIJK, ONBEHOORLIJK y no a tuma e pasonan conforme loke e Statuut di Reino ta bisa den articulo 43. Teniendo na cuenta cu acto aki hunto cu e tantisimo actonan di corupcion cu e gobierno POREDmep ta apoya y sostene, nos a sugeri na sr. Gobernador pa disolve Parlamento “op termijn” y na mes momento suplica e Minister Presidente Croes pa hala un banda y laga un gabinete A-politico percura pa mara mannan di e politico y prepara eleccion otro aña. Asina ey e pueblo Arubano por tin e siguransa cu elo vota pa un gobernacion cu lo mester bay goberna nos pais cu tur reglanan estricto di Good Governance “in place”!
UPP ta convenci, particularmente mirando tambe cu gobierno ta cla pa firma cu Hulanda, cu ta un rumbo mester ser tuma pa asina aki nos por sacudi e Aruba bieo for di nos. Pesey nos ta papia cu tambe riba nivel di gobernacion, representacion politico, despues di 34 aña Aruba mester bay conoce un REBOOT 2.0. Esaki lo mester conta pa tur hende, na tur nivel y gremionan!
Cu e REBOOT 2.0 aki UPP ta convenci cu Aruba lo bay conoce un comienso nobo cu e mannan di e politico mara, y cu lo nifica cu nos pais lo conoce un gobernacion drechi atrobe. Asina nos lo bay recobra nos autonomia cu a ser perdi pa motibo cu e mannan di e politiconan tabata “LOS”!l
Nos pais lo drenta un era nobo na unda tanto nos pueblo como nos partnernan den Reino lo haya e confiansa back den e politiconan cu tambe mester bay biba cu e normal nobo cu lo nifica un NORMAL MIHÓ tambe. Pues un “REBOOT 2.0” riba rumbo pa un normal mihó!
Partido UPP
Booshi Wever
5 november 2020
