Dialuna mainta Prome Minister sra. Evelyn Wever – Croes a duna Parlamento un update di e negociacionnan cu ta andando cu Hulanda. Esaki considerando e embergadura grandi cu esaki tin riba e presupuesto supletorio cu ta wordo trata den Parlamento. 

“Mi por anuncia cu hopi satisfaccion cu nos ta kedando cla cu Hulanda”, Prome Minister a anuncia. 

Despues di e ultimo update na Parlamento, negociacionnan a bay bon, y a yega na 4 cambio importante. Cambionan cu ta salbaguardia e autonomia di nos pais, y cu ta stipula cu tur locual e entidad mester haci ta den consulta cu Gobierno di Pais Aruba.

“Gobierno ta considera esakinan logronan hopi grandi y como Gobierno ta di opinion cu nos mester bay di acuerdo cu e condicionnan pa nos haya fiansa na interes di 0%. Esaki ta necesario pa nos por sigui reconstrui nos pais. Pa nos garantisa pago di salarionan na empleadonan publico, pa nos garantisa pago di subsidio di salario na sector priva, pa nos por  carga e alivio fiscal pa comerciantenan y ciudadanonan cu debe belasting, y pa nos por paga FASE.

Sinembargo lo no acepta e condicionnan sin cu ta duna Parlamento e oportunidad prome pa tuma nota di e cambionan y pa expresa sentimentonan riba e cambionan, Prome Minister a duna di conoce. 

Prome Minister a sigura Parlamento cu den e proceso di negosacion, a tene na cuenta locual cu Parlamento a trece dilanti den diferente reunion publico. Entre otro e mocion cu Parlamento a pasa dia 9 di juli ultimo, y tambe locual cu gremionan a trece dilanti durante di diferente consulta.

Den e documentonan cu Gobierno a ricibi, Hulanda tabata pidi Gobierno pa bay di acuerdo cu e  entidad CHE y pa nos drenta den e Rijkswet Financieel Toezicht (RFT), cual ta existi awo pa Corsou y Sint Maarten. Parlamento di Aruba a pidi pa Gobierno no accepta e CHE manera cu e ta, sino pa duna un ‘tegenvoorstel’ y bay den negociacion cu Gobierno di Hulanda y esey ta locual cu a haci.

Consecuentemente, awo e esencia di e CHE a wordo cambia riba puntonan cual Gobierno ta haya ta substancial. Pa loke ta e RFT tambe a nenga di drenta e sistema di RFT hunto cu Corsou y Sint Maarten. A negocia un propio sistema di supervision financiero basa riba nos leynan y basa riba protocolnan cu a negocia cu Hulanda na 2018. 

“Pues ta a base di e mocion di Parlamento, a sigui negocia cu Hulanda y di cual awe nos por bisa cu nos a logra cambionan substancial”, Prome Minister Evelyn Wever-Croes a enfatisa.