ORANJESTAD – Departamento di Asuntonan Economico, Comercio y Industria (DEACI) mediante su unit di Iniciativa pa Desaroyo di Empresa Arubano (IDEA) a organisa un webinar cu Departamento di Infrastructura y Planificacion (DIP).
Dia 8 oktober ultimo, IDEA conhuntamente cu DIP a organisa un webinar pa presenta e maneho riba ROP 2018/ROPV y e maneho di tereno na Aruba pa e agricultornan. Tambe a elabora e proceso pa aplica pa un tereno (Huurgrond), pa haya un tereno y na unda tin tereno disponibel pa agricultornan. Por ultimo a presenta planes cu DIP ta bezig cune pa e sector aki.
Por bisa cu tawata tin hopi pregunta di cual tur pregunta di e participantenan a wordo contesta na final di e presentacion.
E webinar aki a haya un participacion di en total 57 persona. IDEA ta sumamente contento cu e contenido y acogida di e webinar y tambe di e bon comentarionan ricibi di su participantenan na final di e webinar y via email. Un webinarsigur hopi interactivo cu hopi pregunta di parti di e participantenan y un tremendo presentacion di parti di e dosoradornan, Sr. Mario Maduro, senior beleidsmedewerker y Sr. Robert Maduro, hefe di e Afdeling Toezicht en Handhaving na DIP.
Desde aña 2017, IDEA ta organisa diferente workshop, seminario y training pa nos agricultornan. Na prome lugar pa genera mas actividad economico y na di dos lugar pa sostene e seguridad alimentario na Aruba. Asina despues di e pandemia di Coronavirus na 2020, IDEA a continua cu mas training, na un manera virtual, pa nos agricultornan pa asina informanan riba e oportunidadnan den e sector aki conhuntamente cu entre otroSanta Rosa y expertonan manera Srta. Marylaine Croes (un experto riba ‘Expert Teelt en Groene Technologie’) y Sr. Urvin Leest di MiSimia. Pa brinda informacion riba e incentivonan cu gobierno ta brinda a organisa sesionnan conhuntamente cu Departamento di Aduana tocante e Impuesto liber riba importacion di producto y materialnan pa e sector primario cu ta hasi actividad comercial y cu DIMP tocante e dispensacionnan di impuesto riba Inkomstenbelasting (IK), Winstbelasting (WB) y BBO. Tambe IDEA a organisa un webinar con pa traha un Business Plan dirigi riba agricultura presenta dor di Sra. Judella Trim di IDEA.
IDEA lo sigui cu su trajecto cu enfoke riba agricultornan pero tambe lo organisa webinar na 2020 cu lo wordo dedica na un y tur cu kier cuminsa un negoshi of tin un negoshi existente y kiereduca nan mes riba diferente topiconan comercial.
Un danki na tur e participantenan y un danki special na Sr. Robert Maduro y Sr. Mario Maduro cu a comparti nan experticio cu tur esnan cu a join e webinar. IDEA ta gradici DIP y tur e otro partnernan grandi tras di tur e workshop, training, seminario y webinar nan aki cu nos a presenta desde aña 2017.Keda pendiente pa mas eventonan den aña 2020 cu lo wordo organisa door di IDEA. Por sigui nos riba Facebook page @Idea-Aruba pa mas webinar y otro actividadnan di IDEA den futuro.
