Oranjestad – 5 di october 2020- Aruba Bank a sorpresa Aruba Animal Shelter Foundation (AASF) cu un donacion di AWG. 1,000. Aruba Animal Shelter Foundation (AASF) cu actualmente ta provee 18 cacho adulto, 18 puppies, 10 pushi adulto y 8 pushi chiquito cu un hogar, te ora cu nan wordo adopta pa un famia. Durante di e Drop-Off comunidad por a pasa laga entre otro, cuminda di cacho of pushi, productonan di limpiesa, shampoo pa cacho, serbetenan bieuw cu no ta wordo uza mas y ayudo monetario.
E meta principal di AASF ta pa mehora e calidad di bida di animalnan ariba nos isla y pa caba cu e problema di animalnan ariba caya. Cada aña un total di 250 cacho y 100 pushi ta ricibi e oportunidad pa un mihor bida via di AASF. Lamentabelmente mester pone 7000 animal drumi tur aña. Pa e motibo aki AASF ta enfoca ariba concientisa e comunidad di e pro’s y con’s di tin un cacho of pushi atravez di eventonan y of actividadnan.
Pa haci un contribucion of donacion na Aruba Animal Shelter Foundation (AASF) por fabor yama 582-1623.
Pa mas informacion por bishita nan website: www.arubaanimalshelter.com
