ORANJESTAD – Diabierna anochi a tuma despedida di un yiu di tera, Sr.Vicente Kelly na unda henter pueblo di Aruba ta haya e oportunidad di bin tuma despedida di un musico renombra di Aruba. Vicente Fortunato Kelly a nace y crece den e bario di Papaya, Paradera.
Como mucha Vicente a siña su mes pa toca acordeon y orgel y como adulto el a bay les di piano. Vicente tabata un persona cu tabata compone cancionnan basa riba acontecimentonan cu a tuma luga den su pueblo. E mes ta skirbi, compone y canta su cancionnan. El a haya e titulo di ‘cantor di pueblo’ pa motibo cu pa medio di su cancionnan e tabata trece dilanti sucesonan, creencia, custumbernan y comportacion di nos Arubianonan. Vicente tabata director di tres banda “Los Juveniles”, “La Nueva Fuerza” y “Los Pimentosos” pa hopi aña y a haci varios presentacion den exterior.
Vicente a demostra tambe cu ora bo ta kere den bo mes cultura y musica, trahando cu un team di musiconan – sin discriminacion algun-, bo ta yega hopi leu riba tarima regional y internacional. Un ehempel di esaki ta e cancion “Mi Banana” (1984) cu Vicente a produci cu su banda musical “La Nueva Fuerza” y cu tabata un hit na Santo Domingo, Latino America y New York. Vicente tambe tabata director di tres banda “Los Juveniles”, “La Nueva Fuerza” y “Los Pimentosos” pa hopi aña y a haci varios presentacion na Santo Domingo, Venezuela y Colombia.
E trayectoria musical di Vicente ta impresionante, si nos tene cuenta cu Vicente:
– a cuminsa toca y canta for di ora e tabatin 8-9 aña;
– a cuminsa su carera musical formando parti di e grupo di Aguinaldo “Las Blancas Palomitas” bou di guia di Evelyn Luidens;
– a bay toca cu 14 aña den e banda di su rumannan “Estrellas del Campo”;
– tabatin e corahe cu 17 aña di lanta su propio banda “Los Juveniles” hunto cu Victor Oduber como manager;
– a bay les di piano te ora cu el a forma su mesun bandanan “Los Juveniles” y “La Nueva Fuerza” y
– despues a presenta como musico Arubiano na un di e festivalnan mas importante di Vallenato na Colombia cu su banda “Los Pimentosos”.
Aruba a perde gran musico, kende a laga un tesoro musical atras. No solamente pa su pueblo di Aruba, pero tambe pa e pueblo di e paisnan cu tanto a aprecia y reconoce Vicente su talento y conocemento. Minister di Cultura Sra. Maduro pa motibo di kebrante di salud no por tabata presente, pero si a wordo representa pa su bureau y director di Departamento di Cultura. Un bez mas palabranan di forsa na na casa di Sr. Vicente Kelly, Sra. Elvia Kelly, Vicente su cuater yiunan Reynold, Carolyn, Elton y Ariane mescos cu su yiu Reginaldo, su nieto y nietanan, tur su rumannan y demas famia, amigo y conocirnan. Vicente sosega na pas den brasa di señor.
