Asociacion Arubiano di Prensa (ASAP) ta sumamente contento unda cu Gobernador a invita nan pa un audiencia. Como Asociacion Arubano di Prensa por a duna Gobernador un presentacion di kico ta asociacion y su metanan.
E combersacion cu Gobernador ta keda algo confidencial, asina Miriam “Mimi” Koolman-Rosel, presidente di ASAP, a bisa. A combersa mas o menos 45 minuut cu Gobernador y esaki ta sumamente positivo, hopi informacion valioso. Nan ta agradecido na Gobernador pa scucha nan y e invitacion pa audiencia.
E por conta pa loke ta e asociacion di prensa. Hopi hende a puntra pakico un asociacion di prensa, pero esaki tabata necesario despues cu mas di 30 aña di no tabatin un representante di prensa na Aruba. Prensa tin e responsabilidad como medianan di informacion no solamente di informa, pero tambe educa pueblo. Koolman-Rosel ta kere uniendo e medionan di comunicacion por logra esaki.
ASAP ta pidi su miembronan, coleganan di medionan di comunicacion un tiki pasenshi. Hopi ta bisa di kier bira miembro, pero ta trahando riba e statuto y esaki ta algo hopi importante pa nan sa kico nan por y no por pa atene na dje. Na momento cu esaki ta cla, lo por acepta miembronan. Secretario di ASAP, Mark-Benson Denz, tin e metanan y bishitanan cu lo ta haciendo proximamente.
E asociacion lo sigui cu mas reunionnan cu otro instancianan, departamentonan pa por mira kico ta e miho forma cu prensa di Aruba por torah hunto cu otro, segun Denz. E trabou di prensa ta uno sumamente importante. Mester keda corda tur organisacion e importancia di rol di prensa den comunidad y asina aki Aruba y mundo henter ta informa na tur momento.
