Nos a tuma nota di un articulo di Antilliaans Dagblad riba e conseho di CAFT riba presupuesto 2020. Nos ta asombra cu e matutino tin e detayenan di e conseho aki caba, mirando cu e no ta publico ainda. Gobierno no a duna nan reaccion, pero ya caba e documento aki su contenido ta conoci. Ta di lamenta cu ta saca cierto punto di e carta aki for di contexto pa uzo politico.
ELOGIO PA MANEHO FINANCIERO DI GABINETE WEVER-CROES
Ta importante pa cuminsa na señala cu prome cu e crisis di COVID-19 a impacta mundo, presupuesto 2020 di pais Aruba lo a conoce un surplus. Esaki lo a marca un era nobo, un era di finanzas saludabel y un era di bon gobernacion. Liderazgo di nos Prome Minister, sra. mr. Evelyn Wever-Croes for di 2017 a bin ta conduci na finanzas saludabel, un economia cu ta crece (segun Banco Central), un rebaho di nos desempleo (segun rapport di Departamento di Labor) y un turismo cu lo a sigui crece na 2020 cu 2.8%. Te hasta sr. Knops a reconoce e pasonan significante aki publicamente.
BEGROTINGSWIJZINGING / PRESUPUESTO SUPLETORIO
Den e carta di CAFT nan ta indica cu lo mester bin un cambio den e presupuesto 2020. Y ta e punto aki opositornan politico ta trata di saca for di contexto. Ta mas cu logico cu CAFT ta señala esaki mirando e crisis actual cu ningun hende a premira. Gobierno mes durante tratamento di presupuesto a indica cu lo entrega un presupuesto supletorio na su debido tempo. Parlamento di Aruba a indica cu durante e “halfjaarlijkse rapportage” lo trata cambionan necesario.
PRESUPUESTO REALISTICO TA E PUNTO DI SALIDA
Mester remarca si cu pa Fraccion di MEP, mescos cu pa Gabinete Wever-Croes, e punto di salida ta keda un presupuesto realistico. Ta presupuestonan irrealistico di Gabinete Mike Eman aproba pa CAFT a hinca Aruba den e crisis financiero. Y ta pa e motibo ey nos no ta compronde dicon lo mester presenta un scenario irrealistico, basa riba proyeccionnan, di un supuesto apertura di nos frontera. Mirando cu e presupuesto actual ta basa riba proyeccionnan di Banco Central, Departamento economico y e proyeccionnan aki a te hasta conta cu aprobacion di IMF.
E “POLITICO” GRADUS DI CAFT
Nos ta spera cu CAFT sa di mantene su posicion di consehero imparcial. Aunke e ta remarcabel cu un biaha mas informacion confidencial ta “leak”. Esaki despues cu tawatin un disputa grandi den CAFT, caminda Gradus, presidente di CAFT, no a tene cuenta cu aspectonan social y economico pa Aruba, manera señala pa e representante Arubano.
For di 2008 te cu 2015 e presidente di CAFT, esta señor Gradus, tawata director di e instituto scientifico di e partido politico Hulandes CDA. Manera ta conoci CDA ta e partido Hulandes cu tin vinculonan estrecho cu AVP. Ta hopi remarcabel cu nan ponencia y actitud pa cu Aruba a cambia drasticamente, apesar cu Gabinete Wever-Croes a sa di transforma un deficit di 444 miyon florin den un surplus di 46 miyon florin.
PA CONCLUI
Otro luna Parlamento di Aruba, durante un reunion publico, lo haya un presentacion di Gobierno riba con e crisis actual ta desaroyando y specificamente kico su impacto ta riba nos finanzas publico y economia. Esaki atraves di e mocion cu Parlamento a aproba na 2018, pa percura pa haci cambionan necesario na tempo pa evita malgastamento di recursonan manera Gabinete Mike Eman tawata haci.
