Oranjestad – Durante un conferencia di prensa Minister Xiomara Maduro a brinda informacion riba e yudansa di Reino Hulandes pa Aruba por cuminsa enfrenta e sla financiero y economico di COVID-19.
Sosten di likides, subsidio di salario y fianza na 0% ta parti di e yudansa di Reino
Reino Hulandes na e momentonan aki ta den dialogo pa asina tumadecision na ki manera e Paisnan den Reino lo por yuda otro pa enfrenta y surpasa e crisis economico y financiero cu COVID-19 ta trece cune. Den e reunion di Conseho di Minister di Reino di diahuebs 9 di april, a tuma e decision pa cuminsa yuda, entre otro, Aruba, cu sosten di likides, subsidio pa salario y fianza na 0% di interes.
Sosten di likides
Pa mitiga contagio cu Covid-19, Aruba a bay den un lockdown. Cu esaki nos a cera pa entrada di turismo cu ta e ader principal di noseconomia. E lockdown ta pone cu 80% di entrada di turismo ta cay afor y cune entrada den caha di Gobierno tambe ta keda afecta. Pa percura cu Gobierno por sigui cumpli cu su obligacionnan financiero, pa mantene e sistema di seguridad social y pa brinda alivio, Consehodi Minister di Reino ta brinda yudansa di inmediato den forma di sosten di likides na e suma di 42,8 miyon florin, manera cu CAFT a recomenda pa e promer luna y mey. E suma aki ta menos cu e 76 miyon florin cu Gobierno ta calcula cu tin mester na likides na e momentonan aki, pero e ta un comienso di sosten.
Subsidio pa salario
Banda di sosten di likides, Conseho di Minister di Reino a dicidi pa brinda Aruba yudansa den forma di subsidio pa salario cu e meta pa comercio mantene cupo di trabou. Pa por haci uso di yudansa akiGobierno ta trahando riba e calculacionnan necesario pa asina por haya aprobacion pa e suma cu cual Gobierno por yuda cubri parti di e salario di e trahadornan den sector priva. Mester remarca cu e forma di yudansa aki ta uno costoso cu na promer instante no tabata contacu aprobacion, pero cu despues toch a keda recomenda pa CAFT naConseho di Minister di Reino. Promer cu 1 di mei Aruba lo entregaun plan pa aprobacion di e yudansa aki na comercio.
Fianza na 0%
Conseho di Minister di Reino riba conseho di CAFT a dicidi cu tur ayudo cu Aruba ta haya den forma di sosten di likides y subsidio di salario, lo ta den forma di un fianza na 0% di interes. Esaki ta e facilidad di ‘zachte lening’ cu largo tempo Aruba tabata purba haya di Hulanda, pero cu tabata condiciona na rekisitonan cu Aruba no por a cumpli ainda cu nan. Aki dos aña Aruba lo haya e oportunidad pa refinancia e fianzanan aki y na e momento ey lo stipula e termino y otro condicionnan di pago.
