Hunto cu marinierskazerne ta contribui na proyecto di FPNC
Desde dialuna 6 di april te cu diadomingo 12 di April e team di cushina di Dr. Horacio E. Oduber Hospital ta duna asistencia na Marinierskazerne den forma di 200 cuminda pa e banco di cuminda, esta Fundacion Pa Nos Comunidad (FPNC). Esaki ta pa yuda esnan den nos comunidad cu ta pasando den momentonan extra dificil den cuadro di e pandemia mundial aki. Werner Drent, Chef di Hospital, a duna di conoce cu semper tabatin un bon relacion entre Hospital y Marinierskazerne y den e caso aki nan a acerca Hospital tambe pa asina traha hunto pa realisa esaki. Desde 6 di April te cu dia 12 di april e cushina di Hospital lo ta encarga di cushina p’e banco di cuminda cual ta encera un total di 1800 cuminda. Loke Hospital ta colabora cun’e ta 200 cuminda pa dia cu un menu bastante extensor. Tur dia lo tin algo diferente traha cu hopi amor pa nos prohimo. Hospital su cushina tin suficiente luga y capacidad personal pa traha un cantidad grandi di cuminda. Marvin Albertus, Assistent kok di Hospital, hunto cu otro coleganan di cushina ta participando den e proyecto aki. E ta contento di por contribui cu Fundacion Pa Nos Comunidad. “Esaki ta un experiencia hopi dushi, specialmente den e tempo aworaki cu ta dificil pa esnan di menos recurso”, sra Albertus ta conta. Banda di haci nan trabou diario cu ta cushina pa e pashentnan interna, nan ta sinti nan mes hopi bon cu nan ta haya e oportunidad pa yuda comunidad durante e temporada dificil aki. Sigur un satisfaccion pa ful e team di cushina di Hospital.
Su mensahe na comunidad ta pa tin hopi forsa den e tempo dificil aki, keda cas y be safe!
