Hoben cu a wordo persigui door di un patruya di polis y despues a accidenta, a keda gravemente herida, su situacion tabata asina critico cu mester a mande algun ora despues di a accidenta, cu urgencia cu air ambulance pa Colombia, caminda e hoben aki actualmente ta luchando pa su bida.
Sero Patrishi – Dialuna marduga den careda di 2’or, un a cuminsa un persecusion den Caya G.F Betico Croes door di patruya di Polis di Playa. Polis lo a duna un Scooter un stopteken y esaki pa un of otro motibo lo no cumpli cu ordo di polis y a sigui core.
No ta conoci si esaki tawata un motibo extremo pa a cuminsa un persecusion tras di un Scooter.
E Scooter a pasa varios caminda, manera den Dakota sigui pa Tarabana y despues subi Watty Vos Boulevard. Na altura di e rotonde di ex Codemsa, e scooter a subi e caminda cera bay direccion nort, e patruya cu velocidad halto a sigui tras di e Scooter.
SCOOTER TA ACCIDENTA
Yegando e Paperclip “rotonde” di Sero Patrishi e motociclista a accidenta y a keda seriamente herida, cu hopi sla na cabes, entre otro na cara. Mesora polisnan a pidi asistencia di Ambulance.
Na yegada e paramediconan a mira e situacion serio di e motociclista y cu hopi urgencia nan a transporte pa Hospital.
AGENTE POLICIAL DI FAM W.
Informacionnan cu nos ta dispone di dje ta bisa, cu e agente aki di Fam W. ta esun cu a dicidi di cuminsa cu e persecusion di e motociclista aki, sin cu tawata trata di algo di extremadamente serio/urgente.
KORPSMELDING
Informacion ricibi di un ex polis cu a baha cu pensioen: “Tin un (KM) Korps Mededeling cu no mag persigui(achtervolg) Motorcycle(brommer/Scooter), si no ta algo di bida of morto. Esnan(Polis) envolvi den un achtervolging asina por haya “Dood door schuld” den trafico si e persona yega na fayece. Si e persona keda na bida algo manera a sosode(dialuna marduga na Sero Patrishi) tambe tin un castigo ta colga.”
7 Juni, 2012, Papaya, 3:45 AM
Den area di Papaya, e mesun agente policial aki, tambe tabata envolvi den un persecusion cu un final fatal. Esaki a sosode mas cu 7 aña pasa despues cu e agente aki, kende tawata esun di rango mas halto ariba patruya a dicidi di persigui e chauffeur S.Quandt dfm. Kende a bin ta fayece na e sitio.
Quandt tawata den un Tercel color blauw. Elo a wordo cera door di e patruya di polis cu mesun agente policial aki na mando, paso e otro agente tawata recien den Cuerpo Policial.
Eynan lo a surgi un luchamento feroz unda S.Quandt a fayece na e sitio.
E agente policial di Fam W su uniform tawata marca varios caminda na sanger (esaki tabata prome cu ela cuminsa cu CPR caba).
Despues cu e agente a mira cu Quandt no tawata reacciona mas, ela bolter e curpa sin bida paso e tawata boca abou y a cuminsa desesperadamente cu CPR. Pero ya tawata hopi laat.
Nos tur por corda con e caso aki a conmove Aruba, unda e agente W. a keda algun tempo na cas y despues a reanuda trabou te cu dialuna marduga 14 di oktober 2019 e ta bolbe comete algo casi similar.
Na 2012 a sali na cla segun raportnan investigativo di autoridad cu e victima Quandt aparentemente tawata sufri di un of otro enfermedad y esey lo tawata e posibel causa di su morto.
Pero, no a papia nunca dicon e agente policial su uniform tawata na varios caminda na sanger di e victima.
