Diasabra anochi famia di Paulus “Pau” Martijn di e boto “Gislaine” a bati alarma pa nan ser keri cu no a regresa despues di a bay tira pisca na Baho. “Pau” ta esun cu a baha na Baho pa tira pisca, mientras cu e otro tripulante a keda den boto, pero a ripara cu na dado momento no a regresa mas. E amigo a purba bula na awa pa mira si ta topa cu su amigo Piscado, pero sin exito. El a regresa Aruba y a bati alarma aki pa pidi ayudo.
Mientrastanto e amigo a yega Aruba y a papia cu Polisnan Maritimo y cu Warda Costa di Caribe Hulandes, pidiendo pa ayudo. Lamentablemente, e reto cu tin awor ta cu autoridadnan local ni di Hulanda no tin acceso pa drenta awa teritorial Venezolano, pa cual a pidi Guarda Costa Venezolano pa brinda ayudo.
Famia a bisa nos cu e boto “Gislaine” ta color blanco cu strepi blauw riba dje. E ta mara normalmente na e pier di Rodgers Beach, for di unda el a sali awe mainta pa bay pisca. E amigo a conta nan cu Pau a bay den fondo di lama pa tira pisca, mientras cu a laga un “boei” ta drief riba lama. Esey ta e sistema con Piscadonan ta aplica ora di tira pisca den fondo di lama. Baho ta un area basta plat entre Aruba y Venezuela cu Piscadonan ta uza hopi pa gana nan pan di cada dia.
Locual a sosode awo ta cu e mesun coleganan Piscado a sali cu nan boto pa bay den direccion di Baho pa mira si por topa cu e Piscado cu te ainda ta perdi. Pa botonan individual ta mas facil drenta awanan teritorial Venezolano, pasobra pa autoridad di Aruba of Hulanda, no ta permiti pa drenta teritorio di otro pais.
Warda Costa di Caribe Hulandes a garantisa famia di lo ta den contacto cu Guarda Costa Venezolano pa mira si nan por activa y duna nos Piscadonan un man, dor di tira bista den e area unda el a perde. Pa nan ta mas facil haci e accion di buskeda. E hecho cu ta anochi tampoco ta yuda, pasobra iluminacion ta scars y ta haci e trabou di buskeda mas fastioso tambe.
