Ta exactamente 25 aña pasa cu a habri e prome Coronary Care Unit (CCU) na Horacio Oduber Hospital. Un inversion cu awe por ta orguyoso di dje paso Aruba a conoce su prome unidad di cuido coronario (CCU) cu ta un departamento di hospital specialisa den brinda tratamento na pashentnan cu tin malesa di curason cu ta rekeri cuido di emergencia cuido critico.

 

Inversion grandi

E tempo ey, e cardiologonan cu tabata forma parti di e inicio di Coronary Care Unit (CCU) tabata un cardiologo for di Corsou, dokter Bloem y dokter van Leeuwen principalmente hunto cu dokter Casper Laclé kende ta esnan cu a bin cu e iniciativa pa e cambionan den loke ta cuido di curason. Frans Figaroa, awrendia pensionado, tabata e prome hefe departamento CCU y un di e motornan grandi tras di e gran inversion aki. Un inversion den cuido medico na Aruba cu sigur awendia por mira cu e tabata uno necesario y sigur cu a crece y inova hopi den e ultimo 25 añanan.

 

Frans Figaroa a expresa cu e tempo ey a bin cu e departamento debi na e aumento significante di pashent cu tabata yega hospital cu problema di curason. Pa e motibo ey a bin cu un manera con pa atende miho cu e pashentnan den HOH cu ta yega cu problema di curason. Anteriormente nan tabata bay Intensive Care Unit (ICU), djey a opta pa bin cu un comision cu a hiba e nomber di Cardio Visie. E comision hunto cu e cardiologonan a yega na un acuerdo pa lanta un Coronary Care Unit (CCU). Riba CCU tabata interna e pashentnan cu problema di curason pa atende nan mas lihe y di un manera mas efectivo rondona di e specialistanan di curason y nurse specialisa.

 

Nurse specialisa na palabra

Colega nurse na CCU Silvia van der Biezen tabata t’ey for di e comienso na momento cu CCU a habri na nos hospital. Silvia a cuminsa bisando cu na un principio nan no tabata specialisa den cardiologia sinembargo nan a haya nan mes ta atende cu pashent cu problema di curason mirando cu na aña 1996 dos cardiologo a bin for di Hulanda. Na aña 1998 a yega e turno pa bin cu un estudio pa asina specialisa e nursenan cu tabata trahando caba y asina poco poco e vision a forma pa habri CCU na Hospital.

 

Team orguyoso

E cambio di mas grandi cu e pashentnan a experiencia durante e ultimo 25 añanan ta cu e tempo pa atende nan ta mas cortico, pues nan ta haya atencion medico hopi mas lihe pa asina preveni un ataca di curason. Tambe na aña 2018 a cuminsa na HOH cu intervencion cardiovascular pa asina trata pashentnan cu ta haya un ataca di curason. Anteriormente tabata manda nan exterior cu Air Ambulance y despues di 10 pa 12 ora nan ta yega na e centro caminda basicamente hopi biaha ta laat. Awendia ta brinda e servicio local na HOH mes, pues for di e momento cu e pashent haya un ataca y yega departamento di emergencia ta hiba nan na nos ‘hartkatheterisatiekamer’ pa habri e ader den menos di 90 minuut.

 

Gratitud

Yena di emocion durante un entrevista nurse di CCU Silvia van der Biezen a expresa palabra di gratitud na Frans Figaroa, pasobra e tabata esun cu a pusha conhuntamente cu e team di cardiologo pa por a yega asina leu. Algo cu ta haci Silvia orguyoso tambe ta e reaccion di e pashentnan cu ta super positivo cu e avance medico cu a haci na Aruba e tempo ey cu awe ta mira su frutonan. Hunta di Directiva di HOH ta bisa danki na cada colega y tambe tur ex-colega cu a aporta na loke ta e apertura di CCU 25 aña pasa y claro tur esnan cu a traha duro pa awe nos ta unda nos ta cu un “top of the line” CCU na HOH.
Pabien Hospital, pabien CCU y pabien Aruba!