ORANJESTAD: Diahuebs anochi, den un sala yen na The Movies na Gloria a tuma luga un sesion informativo organisa pa Ministerio di Enseñansa y Deporte pa e studiantenan cu ta desea di continua cu nan estudio na Hulanda. Minister Endy Croes a habri e anochi informativo aki, unda cu a presenta e proyecto y comparti informacion di vivienda na e ciudadnan mas popular pa e studiantenan na Hulanda. Durante e sesion informativo aki, tabatin diferente profesional cu a comparti informacion di, entre otro, alohamento (huisvesting) na Hulanda.
E proyecto a inicia na aña 2022, na momento cu Arubahuis a indica cu tin problema grandi cu vivienda na Hulanda y a urgi e mandatario di Enseñansa pa organisa sesion informativo pa e studiantenan cu ta continua cu nan estudio avansa na Hulanda. Manera ta conoci, e guera na Ukrania y Israel ta pone cu Hulanda ta hayando mas refugiado. Esaki ta trece cu ne cu e cupo di camber ta bira menos. Aña pasa e lista di espera pa haya un camber ta di 1 pa 2 aña, pero pa e aña aki esaki a bira di 2 pa 4 aña. E camber di e ciudadnan, manera Den Haag, Utrecht y Eindhoven ta limita y e lista di espera a bira di 3 pa 4 aña. Sra. Sharine Dubero – Croes di Seccion Facilidad pa Estudio di Departamento di Enseñansa a elabora riba e fiansa di Arubalening y con pa yega na un prestamo, alabes a contesta e preguntanan relaciona cu e topico aki. Adicionalmente, Sra. Paloma Tromp di Fundacion Plan di Bida a duna informacion na e alumnonan tocante maneho di presupuesto. Sra. Lisanne Sambo – Gomez di Realign Caching, Consultancy & Services a trata e topiconan: escogencia di estudio y con pa yena e formularionan. Tambe ta importante pa prepara tanto e mayor, como e studiante pa e reto nobo aki. Sr. Franklin Seute, autor y orado di e buki “Living Rich as a Student in the Netherlands” a comparti tips valioso di entre otro, maneho di placa como studiante. Directora di Kabinet di Aruba Sra. Joslin Croes a elabora riba escogencia di estudio y seguro cu ta hopi importante na Hulanda. Sra. Edseline Gomez di EducationUSA a presenta diferente posibilidad cu tin pa studia na Merca.
Tur aña den luna di september ta planifica pa organisa un anochi informativo pa asina cuminsa prepara e studiantenan cu ta continua cu nan estudio den exterior. Minister Endy Croes a indica cu e tabata un anochi fructifero, sumamento exitoso y ta contento cu e alumnonan a adkiri bastante informacion durante e evento.