Desde dialuna, Aruba Tourism Authority (A.T.A.) a ricibi mas di 67 representante di companianan cu ta bende Aruba (“Tour Operators”) y aerolinea internacional cu a uni pa ricibi un actualisacion di Aruba y di nos industria turistico. E momento importante aki a sirbi como un plataforma esencial pa fortalece colaboracion y pa asegura cu e socionan ta informa di e desaroyonan di e futuro di nos isla. Personanan clave di tanto Merca, Canada, Latino America (Colombia, Brazil, Argentina, Chile, Pero, Equador y Paraguay), y Europa (Hulanda, Italia y Alemania). Un total di 103 persona ta actualmente na Aruba pa e ocasion aki cu ta inclui diferente representantenan di nos hotelnan, estableci den exterior, como tambe diferente miembro di ekipo di A.T.A. y algun prensa internacional.
Durante di e evento na Aruba Airport Authority (AAA), CEO di Aruba Tourism Authority, Ronella Croes, a cumpli cu e honor di hiba palabra di bonbini na tur esnan presente. Sra. Croes a resalta e importancia di provee un actualisacion di e proyecto Gateway 2030 na ‘Tour Operators’ y aerolineanan internacional, mirando cu esaki tin un influencia directo na e experiencia di biahe di nan cliente. Cu e amplacion di capacidad y mehoracion significativo den e infrastructura di aeropuerto, huespednan lo por spera un proceso mehora cu lo añadi na un experiencia positivo.
E anochi a sigui cu presentacion di Chief Revenue Development & Communications Officer & Interim Management Team Member di Aruba Airport Authority (AAA), Sra. Barbara Brown, kende a presenta Fase 1ª di e proyecto Gateway 2030. A pone enfasis riba e futuro di e aeropuerto, compartiendo informacion riba e sala nobo pa check-in pa pasaheronan di Estados Unidos, un programa cu lo inicia operacion den cuminsamento di 2025 y cu eventualmente lo conta pa tur otro pais, y e sistema di maneho di maleta ‘Baggae Handling System’ di ultimo tecnologia.
“E proyecto Gateway 2030 ta un inversion grandi cu ta redefini e hospitalidad y comodidad pa nos pasaheronan. Nos ta compromete pa eleva e experiencia y e eficiencia operacional di e pasaheronan, cual ta haci Aruba un destinacion di biahe di primera clase,” Chief Revenue Development & Communications Officer & Interim Management Team Member di Aruba Airport Authority (AAA), Sra. Barbara Brown ta comenta. Esaki ta un iniciativa transformativo cu ta refleha e dedicacion di e aeropuerto pa duna un experiencia di biahe sin interupcion na tur bishitante. Sra Brown ta termina.
E evento aki a subraya e compromiso continuo di Aruba pa cu innovacion y sostenibilidad, asegurando cu e huesed ta sigui disfruta di un experiencia di biahe sin obstaculo. Pa e ‘Tour Operators’ y aerolineanan, y representantenan di prensa internacional presente, e informacionnan aki ta duna balor adicional cu lo yuda nan promociona Aruba na manera mas eficaz globalmente, mientras cu ta apoya practicanan di turismo sostenibel.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta pone enfasis pa mehora y mantene esfuerzonan pa logra e balans entre cuater pilar: ‘Calidad di Bida di e Residente’, ‘Calidad di Experiencia di e Bishitante’, ‘Proteccion y Preservacion di Naturalesa & Medio Ambiente’, y ‘Contribucion Economico na nos isla’. Ta enfoca na atrae e bishitante cu lo inverti mas (calidad en bes di cantidad mirando cu capacidad di carga ta sigui ricibi atencion di parti di A.T.A.), lo aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion.
Tocante AUA Airport
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 78% ta di Merca y Canada, 14% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
