Pronto Musco ta na Aruba pa duna conseho y oferta pa e canchanan deportivo.

ORANJESTAD: Durante e biahe di trabou na Williamsport, Minister Endy Croes tabatin diferente reunion planifica cu diferente stakeholder. E prome reunion tabata cu Sr. Christopher Hansen, kende ta manager di Musco pa e region Centro America & Caribe. Musco ta un compania di luz renombra cu a wordo estableci na aña 1976 y ta activo na diferente pais na Europa y rond mundo. E compania tin tur tipo di luz, entre otro pa stadion di futbol, baseball, softball, futbol Mericano y cricket. Na Merca casi tur facilidad deportivo ta haci uzo di e sistema di luz di Musco. Tambe nan ta fabrica tur tipo di poste di luz di calidad y nan tin un amplio experticio den calidad di luz y ta calcula cuanto lux e veld tin mester. Musco ta un partner crucial di Williamsport Little League World Series, pues nan ta maneha tur veld di little league internacional. E mandatario di Deporte a reuni cu Sr. Hansen, unda cu a delinea e trabou. Pronto Musco lo ta na Aruba pa duna conseho y oferta. “No tin nada concreto ainda, pero lo haci uzo di nan experticio pa ricibi mas conseho y oferta pa e canchanan deportivo na Aruba. E trabounan ta continua na bienestar di deporte en general” Minister Endy Croes a finalisa.