ORANJESTAD – Mangrovenan ta den peligro: ta calcula cu mas cu 3/4 di mangrovenan den mundo ta den peligro y conhunto cu nan, henter e organismo aquatico y terestral cu ta depende di nan. Esaki ta motibo pa UNESCO a decidi pa actua pa proteha nan, hunto cu otro ecosistemanan valioso di carbonnan blauw. E proteccion ta bin via UNESCO su Geoparks, Lugarnan di Patrimonio di Mundial (WH) y reservanan di biosfera (MAB).
Mangrovenan ta un link entre tera y lama. Raizan den awa salo y tera espuesto na marea, e matanan ta forma un universo unico y fragil; un refugio di bida cu mester ta proteha.
For di nan raiz te cu punto di nan takinan mas halto, mangrovenan ta un habitat complica caminda hopi especie ta bini pa come y reproduci, y ta un di e ecosistemanan mas prospero cu tin. E sistemanan aki ta vital tambe pa ser humano, pasobra nan ta baha e erocion di e costa y ta un fuente di cuminda pa hopi hende.
Door di cambio climatico, nos mester bay mas leu pa proteha nan, pasobra e mangrovenan tambe ta sirbi na un manera clave cu deposito di carbon. Esaki ta e motibo pa un proyecto di UNESCO cu ta trata e restauracion di e mangrovenan den siete pais latino-americano. E proyecto aki no solamente lo trece oportunidadnan economico pa comunidatnan local, pero tambe lo permiti cu conocemento ta comparti entre populacion local y indigena cu e comunidad cientifico.
Ademas di proteccion y restauracion, mester tambe un consenshi mundial di e importancia di mangrovenan. Esaki ta nifika educa y alerta e publico, no solamente den scol, pero tur caminda cu ta posibel. Door di e conscientisacion riba e misterio di mangrovenan, nos lo por preserva nan sosteniblemente. Esaki ta e obhetivo di e Dia Internacional pa Conservacion di e Ecosistema di Mangrove: pa tur hende den nos sociedad tuma consenshi di e balor, e bunitesa, y e vulnerabilidad di e ecosistema di e mangrove y proteganan.
E Conferencia General di UNESCO a adopta e Dia Internacional di Mangrove na 2015 y ta celebra esaki tur 26 di juli.
Na Aruba tin diferente proyecto y organisacion cu ta activamente involvi den proteccion y restauracion di nos mangrovenan. Di parti UNESCO Aruba nos ta activamente bezig tambe cu nos partnernan pa bin cu un reserva biosferico (Man and Biosphere label (MAB). Nos ta activamente bezig tambe pa introduci mas literatura di lama na nos scolnan via e Ocean Literacy program.
