Aruba Tourism Authority (A.T.A.) ta sumamente orguyoso pa mira atletanan cla pa representa Aruba durante weganan Olimpico Paris 2024.

Como compromiso pa deporte na Aruba, A.T.A. a compromete pa cinco aña consecutivo na Commitee Olimpico Arubano (C.O.A.) na varios aspectonan crucial a traves di un acuerdo cu ta resalta e dedicacion como un organisacion.

A.T.A. ta reconoce y balora e trabou consistente y excelente cu C.O.A. a bin ta haci pa hopi aña como un parti instrumental den crea un reputacion fuerte y un imagen positvo pa nos ekipo Olimpico segun reglamento, regulacion, y standard di Olympic Charter. Asina demostrando integridad y dedicacion durante cada paso di e trayectoria pa asina desaroya y fortalece atletanan local na un nivel Olimpico.

Esaki ta un momento di orguyo pa cada un di e atletanan cu lo bai representa Aruba dignamente: Chloë Farro y Mikel Schreuders cu lo competi den landamento, Ethan Westera y Just van Aanholt – vela, Shanayah Howell – ciclismo/BMX, y Philip Elhage – tiro.

Nos ta reconoce e balor y representacion inmenso di cada atleta cu lo fungi como embahadornan di Aruba. Caminda cu lo promove e isla, no solamente como un destinacion turistico, pero alabes como un tera di talento deportivo.

A.T.A. ta expresa un gratitud inmenso na Commitee Olimpico Arubano pa un bunita colaboracion y aporte pa deporte na Aruba.

Exito na nos atletanan!

Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.