Diasabra atardi nos a publica un noticia cu a detene 3 persona banda di Bushiribana, e motibo di e detencionnan aki ta debi na cu nan ta 4 stranhero ilegal na Aruba y nan no por a ustra permiso. A detene nan como sospechoso di ladronicia for di autonan di turistanan. Aki ta sigi e reportahe policial.

Diasabra atardi a drenta informe di un caso di ladronicia for di den un auto na Boca Mahos. Mesora a dirigi un patruya na e sitio. Na yegada di e patruya a bin compronde cu aki ta trata di ladronicia den dos diferente auto unda desconocidonan a bay cu pertenencianan di 5 turista. Den e pertenencianan lo a bay cu un telefon di un di e turistanan y e a indica cu por track e y a duna polis e location. Aki mesora polis a bay na e sitio na Ayo unda a bin haya un tas preto cu 2 telefon den dje. Recherche y e investigadornan technico y forensyco a bin na e sitio pa asina haci investigacion. Segun testigo a bin compronde cu un Suzuki blanco y un Chevrolet berde cla lo tabata envolvi den e ladronicia aki ya cu nan tabata cerca di e autonan. Pa casualidad net na e momenton ey e 2 damanan turista a cuminsa grita cu ata e autonan ey atrobe direccion Boca Mahos, polis a sali bay nan tras. Polis a para e dos autonan aki y a haci un control. E 4 personanan aki ningun di nan por a mustra ni rijbewijs ni cedula. Polis mesora a detene nan y hiba nan Warda di polis. Polis a confisca e autonan pa investigacion. Polis a hiba nan Guarda Nos Costa unda despues a informa cu 1 un di e personanan lo ta illegal y e otro tres lo a entrega un peticion pa asilo. Polis a tuma datos di e susedido aki y a informa central di polis di un ke otro.