ORANJESTAD: Durante Conferencia di Prensa di Gobierno di Aruba, Minister di Enseñansa y Deporte Endy Croes y Sra. Gina de Kort di Departamento di Enseñansa Aruba (DEA) a papia tocante e cambionan cu lo tin entrante e proximo aña escolar. Diaranson ultimo, a splica cu entrante aña escolar 2024-2025, e alumnonan di klas 1 di scol basico lo siña lesa y skirbi na Papiamento. Lo siña Hulandes tambe como materia (idioma stranhero) y na un forma responsabel, mirando cu nos muchanan no ta domina hopi palabra na Hulandes ora nan drenta klas 1. Lo sigui brinda e otro materianan manera, Matematica (Rekenen), den e forma cu semper a wordo duna.
Segun rapport di CBS, Papiamento ta e prome idioma of e idioma mas papia pa 80% di nos comunidad, mientras cu solamente 13% di e hogarnan na Aruba ta papia Hulandes na cas. E ta cientificamente proba cu si muchanan forma un base fuerte den nan propio idioma, nan por siña e otro idiomanan hopi mas facil y miho. Ademas, siña lesa y skirbi den idioma materno Papiamento lo haci cu nos muchanan lo compronde loke nan ta skirbi y lesa y lo stimula nan habilidadnan di siña en general. Esaki lo ta beneficioso pa nos muchanan, mirando cu nan lo bira critico di pensamento y lo ta mas prepara pa duna nan opinion durante les, den nan propio idioma.
E cambionan aki ta forma parti di un proceso delinea door di un comision di Maneho di Idioma, cu a traha un nota despues di a consulta cu mas di 80 organisacion den nos comunidad. E comision aki tambe a haci un inventarisacion di kico tur mester haci pa por logra introduci e maneho nobo di idioma. Pues, a inventarisa e materialnan cu tin y e materialnan cu mester traha pa asina por haci introduccion di e maneho nobo di idioma corectamente. A inverti alrededor di 1.2 miyon florin pa por realisa tur e materialnan aki na tempo pa augustus proximo.
Concluyendo, siña lesa y skirbi den nan idioma materno Papiamento, lo beneficia e muchanan den nan proceso di siñamento, desaroyo di inteligencia emocional y habilidadnan critico di pensamento. Ademas di esaki, nan por conecta miho cu nan raisnan cultural. Nos muchanan lo sinti mas sigur den nan proceso di siñamento, pasobra esaki ta alinia cu nan idioma materno y nan cultura.