Cu un iniciativa ambisioso, Aruba Tourism Authority (A.T.A.) a completa un estudio referent ‘eventonan’ riba calendario di evento cu A.T.A. ta entre otro patronisa. Pa esaki a contrata e compania cu experiencia amplio den e area aki, esta CSL International. Nan ta specialisa den estudio di entretenimento, hospitalidad, y recreo. E meta di e estudio aki ta pa reforsa e portafolio di eventonan teniendo na cuenta un desaroyo sostenibel di turismo y ampliacion di experencianan unico pa por atrae bishitante di balor halto. Durante un atardi, cu presencia di diferente socionan local cu a participa den e inisiativa aki, a elabora riba e estudio extensivo aki.

E enfoke di A.T.A. ta basa riba facilita experencianan unico pa por aumenta e cantidad di placa cu e bishitante ta gasta durante di su estadia. Esaki ta haci pa medio di entre otro patrosinio y sosten na por ehempel Aruba su Carnaval, KLM Marathon, Aruba Hi-Winds, e Bonbini Festival, Aruba Art Fair, Dia di Brazil, pero tambe por ehempel e Aruba Art Fair. Y ta duna aporte na e Aruba Soul Beach Music Festival y a sa di duna aporte na varios otro evento musical. Tambe A.T.A. ta sostene Comicion di Celebracionnan Nacional por ehempel, pero tambe e Aruba Signature Experience cual ta un colaboracion cu Credits y diferente evento deportivo cu ta cuadra cu maneho di A.T.A.

Den e estudio a evalua y explora posibilidad di desaroyo di eventonan, impacto economico, analisis di e mercado, infrastructura, regulacion y permiso, identificacion di mercado atractivo pa Aruba, y competencia den e region. Cu e evaluacion aki, y cu e posibilidad pa logra e meta di turismo ‘High Value-Low Impact’, dos punto cu a destaca durante di e presentacion, cual ta bienestar di e hende ‘Wellness’ y luho ‘Luxury’. E analysis ta indica cu eventonan y maneho mas dirigi riba esaki por ta mas den linea cu e modelo di ‘High-Value, Low-Impact’. Aki por pensa riba eventonan mas intimo y elementonan di “Wellness” y mas “Luxury” cu lo permiti pa genera mas impacto economico y cu ta mas den linea cu un vision sostenibel y cu kiko ta cuadra cu Aruba.

Cu e estudio aki, A.T.A. ta desea di expande e posibilidadnan na Aruba na un manera responsabel y sostenibel, teniendo na cuenta diferente desaroyo cu a bin ta tuma lugar. Lo usa e estudio pa ahusta maneho di A.T.A. Lo continua cu diferente aspecto di e maneho actual, pero estudionan asina ki ta mantene A.T.A. scerpi, como tambe otro socionan – gubernamental & no gubernamental.

A.T.A. ta gradici tur cu a forma parti di e proceso di realisacion di e estudio, incluso varios Ministers cu a participa y cu cual tambe a reuni siman pasa pa asina pasa riba resultadonan di e estudio.

Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balans menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.