Na luna di januari Horacio Oduber Hospital a comparti un compilacion di loke tabata aña 2023 y awo den cuadro di transparencia y informacion nos ta sigui brinda e cifranan di HOH pa loke ta luna di januari 2024. Asina nos como HOH ta duna comunidad di Aruba un indicacion di loke ta cuido, e parti diagnostico y tambe donacion di sanger.

 

Na januari 2024 a hospitalisa 882 pashent cu ta mas halto cu na luna di december (819 pashent) pero ta similar na luna di november 2023. Tambe loke por compara ta e operacionnan cu a tuma luga, esta na luna di januari 540 pashent a wordo opera y na december 2023 tabata 397 operacion y na november e tabata 566 operacion. Por mira un reduccion den e cifranan pa loke ta admision y tambe operacion na luna di december y un di e motibonan tras di esaki ta cu camber di operacion ta tuma anualmente un receso fin di aña, pues menos operacion ta tuma luga durante luna di december y consecuentemente menos admision tambe ta tuma luga.

 

Loke si ta alarmante y a haci esaki conoci den comunidad ta e ocupacion di cama cu na januari tabata 99,9%. Na november 2023 e tabata na 79% y december 89,7%. A anuncia na januari cu Hospital ta hopi yen di pashent y hasta por yega na cancela operacionnan cu ta planea mirando cu semper mester mantene cama habri pa casonan di emergencia y esaki por mira bek awo den e cifra di ocupacion di cama.

 

A nace un total di 75 baby na januari cual ta 3 baby menos cu na luna di december. Y na januari Bloedbank Aruba a ricibi un total di 196 donacion di sanger.

 

Departamento di Emergencia a mira na januari un total di 2953 pashent cual ta menos cu na december cu tabata 3262 pashent.

 

Specialistanan den servicio di HOH a haci un total di 6675 consulta cu pashent cu ta mas halto cu na december (5657 pashent). Esaki tambe tin di haber cu e dianan di fiesta di fin di aña. Departamento di Radiologia a haci un total di 5145 test manera CT scan, MRI y mas. E cifra aki ta mas halto cu na december (4122) y tambe mas halto cu na november (4651). Un total di 12272 persona a bishita LABHOH pa haci nan test cual ta mas halto cu na december (9120) y tambe november (11453). Y na januari un total di 841 pashent a sali for di Hospital.

 

Pues por mira cifranan di januari completamente diferente cu na december den varios area, pero tambe claramente por mira con yen Hospital tabata na luna di januari. Danki na cada dunado di cuido pa nan tremendo trabou y profesionalismo y tambe palabra di gratitud na esnan cu ta traha patras di cortina pa asina brinda asistencia na coleganan den cuido paso nos tur na HOH semper t’ey!