Dialuna 12 di december, a trata den Parlamento di Aruba e presupuesto supletorio di Pais Aruba pa aña 2023. Durante e reunion aki, Gobierno di Aruba a presenta cambionan den presupuesto 2023 di cual tur ta budget neutral. No ta manera añanan 2010-2017 di AVP, unda AVP tabata malgasta miyones extra den un deficit enorme como parti di e Mega Debe cu AVP a construi. AVP mes a aproba na inicio di aña un presupuesto cu un deficit gigantesco y na final di aña ta bin legalisa e malgastamento di e “extra” miyones a traves di Parlamento di Aruba. Marisol Lopez – Tromp ta compronde perfectamente “de que se trata” paso e tambe a forma parti di e 8 añanan di e desaster di AVP y a vota “VOOR” e presupuestonan pa crea e Mega Debe cu Mike Eman y AVP a ocasiona na e pais aki.
Marisol Lopez Tromp y Aquannette Gunn a dal nos grandinan un bofta:
Parlamentarionan Marisol Lopez – Tromp y Aquannette Gunn a dal tanto enseñansa y nos pensionadonan un BOFTA den nan cara. Kico a pasa realmente 12 di december den Parlamento di Aruba? Durante tratamento di e presupuesto supletorio a presenta proyectonan adicional unda cu den e presupuesto tin placa cu por wordo aloca. Pues, no mester a manda Aruba mas den ROOD. Gabinete Wever – Croes ll a presenta a traves di Minister di Enseñansa un Juliana Mavo School completamente nobo cual tawordo construi den e districto di Paradera. Un proyecto di 6.7 miyon florin. Banda di esaki, a presenta e di dos fase di Mon Plaisir College pa un suma di 2.6 miyon florin. Tambe a presente un suma di 7.2 miyon florin pa SABA. Esaki ta pa cubri 3.9 miyon di gastonan operacional pendiente y 3.3 miyon pa “rechttrekking” di salario di empleadonan cu pa varios aña ta bringando pa esaki. SABA manera ta conoci ta traha hustamente pa cuida nos grandinan, esta cuida nos pensionadonan. Tur e placanan aki a bin di e “meevaller beleid” esta placa adicional despues cu Aruba a cumpli cu palabracion cu Hulanda, esta e surplus di 1% palabra den protocol. Na 2003 y 2008 ta unico añanan bou di MEP cu Pais Aruba a conoce surplus. Pues, no lo kibra palabracion cu Hulanda y tampoco mester a presta mas placa. Hustamente un maneho pa cumpli cu enseñansa, nos grandi– y empleadonan na SABA den cuadro di e placa cu tin disponibel na e momentonan aki. Marisol Lopez – Tromp y Aquannette Gunn mescos Gerlien Croes y AVP lo bay den historia pa vota CONTRA e proyectonan aki. Pues CONTRA 6.7 miyon pa construccion di un Juliana School nobo na Paradera, CONTRA 2.6 miyon pa contruccion di Mon Plaisir College, CONTRA 3.9 miyon pa gastonan operacional di SABA y contra 3.3 miyon pa e“rechttrekking” di salario di e empleadonan di SABA. Pues,CONTRA nos hobennan den enseñansa y contra nos pensionadonan. Nos ta lamenta masha hopi e actitud infantil y no corecto di nos Parlamentarionan di Oposicion. Nos ta di opinion momento cu algo ta bon pa Pais Aruba y pa e empleadonan cu tabata sclamando pa un oido ta deber di e parlamentario pa pone interes di partido AVP, MAS y Gerlien independiente un banda y VOTA pa e interes general di pais. Pueblo lo termina dunando un score na e actitud repudiabel aki di dicho parlamentarionan den proximo eleccion. Danki na e 12 votonan di sosten cu e proyectonan aki a wordo aproba y lo bira un realidad. Politiconan di panlefi manera Marisol Lopez – Tromp, Aquannette Gunn y Gerlien Croes mester wordo castiga cu un voto di desconfiansa den proximo eleccion.
