Relaciona cu “Dia Mundial di Diabetes”, e aña aki un biaha mas Aruba One Happy Island Lions Club a sigui cu su campaña di prevencion di Diabetes door di informa, educa y conscientiza nos comunidad riba e padecimento aki poniendo enfasis special riba nos muchanan.

 

Diabetes ta un epidemia mundial cu no ta discrimina genero, ni edad. E complicacionan principal ta enfermedad cardiovascular, ceguera, problema cu riñon y amputacion di pia. Ta ser calcula cu pa aña 2045 alrededor di 700 miyon persona lo padece di diabetes.

 

Bringa Diabetes ta un di servicionan global di Lions Club International, cual ta un desafio grandi pa nos humanidad y como Lions Club nos ta kere cu ta nos deber pa enfrenta esaki.

 

Na Aruba actualmente tin mas di 8000 persona cu ta uza medicamento pa diabetes, no por laga afo cu pa cada persona cu ta diagnostica y sa cu nan tine, tin un persona eyfo cu no sa cu nan tin diabetes, resultado cu e cifra real ta dobel. Pa locual ta mucha bou 14 aña na e momentonan aki Aruba tin 25 mucha cu diabetes tipo 1 y 1 mucha cu diabetes tipo 2.

 

Aruba One Happy Island Lions Club hunto Fundacion Diabetes Aruba, POH siman pasa tabata na scol basico Santa Anna na Noord caminda a duna un presentacion informativo y educativo riba Diabetes y Nutricion, concientizando nos muchanan riba un alimentacion saludabel y un bida activo.

 

E meta di e presentacion tabata pa empodera nos muchanan cu conocimento riba diabetes, pa reduci y preveni pa nos muchanan haya diabetes tipo 2 y alabes conoce mas di serca kico diabetes tipo 1 ta, creando un ambiente na scol cu ta duna sosten y miho entendimiento riba e tema aki.

 

E presentacion tabata uno interactivo y participativo cu e alumnonan, a splica riba entre otro e posibel sintomanan di diabetes cualnan ta sed excesivo, orina frecuentemente, falta di energia, wak wazig… etc.

 

Den forma di wega a presenta diferente productonan manera yogurt, malta, juice, fruta, pastechi, softdrinks ….etc, productonan cu ta wordo consumi diario y con pa haci uzo di esakinan di un forma mas sabi. Con pa mantene nos mes saludabel? Come bon! Tambe riba e beneficionan di realisa actividad fisico, por ehempel door di haci un deporte.

 

Tur alumno di e scol a ricibi un appel y tambe a comparti foyetonan informativo con pa come y hiba un bida saludabel.

 

Aruba One Happy Island Lions Club ta gradici specialmente Fundacion Diabetico Aruba, Praktijk Ondersteuner Huisartenzorg (POH), Scol Basico Santa Anna y tambe na Cede Aruba, Utilities NV, Bingo Aruba y Setar NV pa nan aporte pa por a realiza e presentacionnan aki. Por ultimo danki na tur miembro Lions pa nan cooperacion.