Manera tur viahe exitoso cu Lider di MEP y Prome Minister di nos pais a haci pa exterior, su viahe cortico di trabou dos siman pasa pa Hulanda un biaha mas a duna fruta na benificio di nos pais. Mayoria den Eerste Kamer a duna Evelyn Wever-Croes rason y ta pidi pa reconsidera e acuerdo di 6,9% di interes cu Gobierno di Aruba a firma cu Hulanda dialuna 10 di October ultimo.

 

E 5 fraccionnan, PvdD, GroenLinks/PvdA, BBB, Volt y OPNL no ta di acuerdo cu e decision di Secretario di Estado Alexandra van Huffelen pa cobra Aruba 6.9% di interes pasobra nos pais no ta acepta supervision financiero den un ley di Reino considerando e lasonan den Reino. Esaki ta e resultado di e conbersacionnan cu Prome Minister tawata tin cu e Comision di Relacion di Reino dos siman pasa na Hulanda.

 

Partido MEP ta hopi orguyoso di nos Lider kende desde prome dia di su maneho di Gabinete Wever-Croes na final di aña 2017, a traha incansabel, y a hiba un lucha contra reto tras di reto pa asina salvaguardia trankilidad di cada Arubiano. Un dama cu no solamente a haya un pais financieramente kibra door di un debe cu a wordo causa door di e maneho iresponsabel di ex-Premier Eman den tempo cu no tawata existi niun crisis, pero tambe el a encontra retonan social hopi grandi den nos pais causa tambe door di e maneho iresponsabel di e ex-Premier, kende awe, nos por considera un di e crisisnan di mas grandi cu nos pueblo a conoce.

 

Mientras cu Gabinete Wever-Croes tawata manehando crisis Eman, Covid a dal mundo y Aruba no a keda afo. Y cu desicionnan tuma responsabel y na tempo, Aruba mester a acudi na Hulanda pa ayudo pa nos pueblo sobrevivi y asina Aruba a keda cu un debe di Corona di Awg. 915 miyon florin. E placa aki tawata necesario pa cumpli cu diferente obligacion cu nos pueblo. Entre otro, Gobierno a introduci e proyecto di FASE pa yuda esnan cu a perde trabou; a bin cu e proyecto di Loonsubsidie pa yuda e sector priva pa mantene nan trahadonan riba nan payroll. Y asina, Gobierno a introduci varios otro proyecto di sosten cu sigur 1 di cada 2 adulto mester a depende riba esakinan.

 

Dia10 di October Gobierno a firma e acuerdo cu Hulanda mientras cu Gobierno a priminti cu lo traha riba un otro solucion y lo keda na mesa cu Hulanda. Y esaki ta loke Prome Minister di nos pais ta haciendo tambe y cu su viahe ultimo na Hulanda a logra un prome paso cu lo habri porta pa un posibel reduccion di e 6.9% di interes riba e debe di Corona.

 

Partido MEP ta felicita nos Lider Evelyn Wever-Croes y ta gradici’e pa su amor y determinacion pa hiba conbersacionnan te na Hulanda cu esnan concerni pa asina pronto haya solucion riba e punto aki tambe.